1Baisiraele ba tlile ba hloma mešaša molaleng wa Moaba mošola wa Jorodane, mo ba lebanego le motse wa Jeriko.
2Balaka morwa wa Tsiporo a bona tšohle tše Baisiraele ba di dirilego Baamori.
3Bamoaba ba tšhoga gagolo ge ba bona setšhaba se, ka gobane e be e le se sentši, ba tlalelwa ka baka la Baisiraele.
4Ba Moaba ba bolela le bagolo ba Midiani ba re: Bjalo bontši bjo bo tlo fediša tšohle thoko tšohle, bjalo ka pholo ge e kgolakgolela bjang bja naga. Kgoši ya Bamoaba mehleng yeo e be e le Balaka morwa wa Tsiporo.
5Yena eo o romile batseta ba ya go Bileama morwa wa Beoro wa kua Phethore nokeng, nageng ya ba leloko la gabo; a mmitša a re: Tseba gore go na le setšhaba se se tšwilego Egipita; se seno! Se enetše lefase, gomme se agile mo ke lebanego naso.
6Bjale a ko tle o nthogele setšhaba se, gobane se mpheta ka maatla. Mohlomongwe ke mo ke tlogo se fenya, ka se raka nageng ye. Ka gobane ke tseba gore, yo wena o mo šegofatšago o šegofetše, yo o mo rogago o rogilwe.
7Gomme bagolo ba Moaba le bagolo ba Midiane ba sepela ba ya ba swere moputso wa senoge diatleng tša bona. Ba fihla ga Bileama ba mmotša se Balaka a se boletšego.
8Bileama a re: Lalang fa bošego bjo; ke tlo le fetola bosasa ka mo Morena a tlogo mpotša ka gona. Matona a Bamoaba a dula moo ga Bileama.
9Bošego Modimo a tla go Bileama a re: Banna bao ba ba lego fa ga gago ke bomang?
10Bileama a re: Ba romilwe ke Balaka morwa wa Tsiporo; o re:
11Tseba gore kua Egipita go tšwile setšhaba, se enela lefase le. A ko tle o nthogele setšhaba se; mohlomong ke mo ke tlogo kgona go se fenya ka se raka.
12Modimo a laela Bileama a re: O se ke wa ya le bona. O se ke wa roga setšhaba seo, gobane se šegofaditšwe.
13Bileama a tsoga a botša matona a Balaka a re: Boelang gae; Morena o gana go ntumelela go sepela le lena.
14Matona a Moaba a tloga, a boela go Balaka, a re: Bileama o ganne go tla le rena.
15Balaka a fela a sa roma matona a mantši a a fetago ala ka bogolo.
16Ba fihla go Bileama ba re: Balaka morwa wa Tsiporo o re: A o se ke wa ba le se se go thibelago go tla go nna.
17Ke tlo go leboga ka tše kgolo, ka dira tšohle tše o tlogo mpotša tšona. A ko tle o nthogele setšhaba se.
18Bileama a fetola a botša batseta ba Balaka a re: Le ge Balaka a ka mpha gauta le silifera e kago tlatša ngwako wa gagwe, taelo ya Morena nka se ke ka e feta ka thoko ke dira tše nyenyane le ge e le tše kgolo.
19Bjale le lena lalang fa bošego bjo, gore ke tle ke tsebe se Morena a tlogo buša a mpotša sona.
20Bošego bjoo Modimo a tla go Bileama a bolela le yena a re: Ge banna ba tlile go go bitša, gona tsoga o sepele le bona; fela, o dire se nna ke tlogo go botša sona.
21Ka la ka moswana Bileama a tsoga a beleša pokolo ya gagwe ya tshadi, a wela tsela le matona a Moaba.
22Fela, bogale bja Modimo bja tuka ka gobane a sepela; gomme Morongwa wa Modimo a mo ema tseleng a le lenaba la gagwe, Bileama a tla a nametše pokolo ya gagwe, a na le bahlanka ba babedi ba gagwe.
23Pokolo ya bona Morongwa wa Morena a eme tseleng, a khwamotše tšhoša a e swere ka seatla; pokolo ya fapoga tseleng ya hlahlatha hlageng; Bileama a e tia, a e bušetša tseleng.
24Morongwa wa Modimo a ema mo go bego go le dirapa tša morara, mo go bego go na le maboto ka dithoko.
25Pokolo ge e bona Morongwa wa Morena, ya ikgohla ka leboto, ya pateletša leoto la Bileama ka leboto; yena a boela a e tia.
26Morongwa wa Morena a buša a fetela pele a ema felo mo go pitlaganego, mo go se nago sebaka sa go arogela thoko ya le letona le ge e le ya le letshadi.
27Pokolo ge e bona Morongwa wa Morena, ya botha ka tlase ga Bileama. Bileama a tuka bogale a e tia ka lehlotlo.
28Bjale Morena a mumolla molomo wa pokolo, ya bolela le Bileama ya re: Ke go dirile eng ge o bile o nkotlile gararo?
29Bileama a bolela le pokolo a fetola a re: Ke ka gobane o raloka ka nna. Ge nka be ke swere lerumo, nka be ke go bolaya e sa le bjale.
30Pokolo ya fetola ya re: A ga ke pokolo ya gago, ye o e nametšego go tloga mola o eba mong wa ka go fihla lehono? A nkile ka ba le mokgwa wo ka go dira tše bjalo?
Bileama a re: Aowa!
31Ya ba gona Morena a budulolago mahlo a Bileama, a bona Morongwa wa Morena a eme tseleng, a khwamotše tšhoša, a e swere ka seatla; Bileama a khunama a inamela fase.
32Morongwa a re: Ke ka baka la eng ge o otlile pokolo ya gago wa ba wa dira gararo? Tseba gore nna ke tšwile ke le lenaba la gago ka gobane leeto la gago le a mphapoga.
33Pokolo yona e mpone, ya ntšhikologa ya dira gararo. Ge e ka be e sa ka ya ntšhikologa, nka be ke go bolaile kgale, yona ka e lesa ya phela.
34Bileama a fetola a bolela le Morongwa wa Morena a re: Ke sentše, ka gobane ke be ke sa tsebe ge e le wena o ntšhegelago tseleng. Gomme bjalo, ge o bona e le tsela e mpe, lesa ke gome ge.
35Morongwa wa Morena a bolela le Bileama a re: Sepela le banna bao. Fela, o se ke wa bolela lentšu le lengwe, ge e se le nna ke tlogo go botša lona. Ka gona Bileama a sepela le matona a Balaka.
36Balaka ge a tsebišwa gore Bileama o a fihla, a tšwa a yo mo gahlanetša motseng wa Arimoaba, o lego nokeng ya Arinoni kwa pheletšong ya mellwane.
37Balaka a bolela le Bileama a re: O reng o sa ka wa tla mola ke roma batseta ba go bitša, ka ba ka boeletša? Afa o be o re ke hloka sa go go leboga?
38Bileama a fetola a re: Ke nna e! Ke tlile go wena. Bjale ga go selo se nka kgonago go se bolela. Se ke tlogo se bolela ke Lentšu le Morena a tlogo le bea molomong waka.
39Gomme Bileama a sepela le Balaka, ba tla motseng wa Kiryathe-Husothe.
40Balaka a hlaba dikgomo le dinku, a iša dibego go Bileama le go matona a a bego a na nae'.
41Ka la ka moswana Balaka a tloga le Bileama a mo nametša meboto ya Baali, a mmontšha mo go fihlago dinakana tša setšhaba sela.
Who We AreWhat We EelieveWhat We Do
2025 by iamachristian.org,Inc All rights reserved.
