1 KORONIKA 20 - Northern Sotho 1951/1986（NSO51）

Dafida o fenya ba Raba, le Bafilisita

1Ngwaga wa feta. Gwa tla lebaka le magoši a tšwago dira ka lona. Joaba a rapa dira tše kgolo, a senya naga ya Baamoni, a tla a rakella motse wa Raba. Dafida o be a šetše Jerusalema ge Joaba a hula motse wa Raba a o šwalalanya.

2Dafida a tšea mofapahlogo wa Milikomo, a hwetša boima bja wona e le talente e tee ya gauta, o na le talama ya bohlokwa; yona ya rwešwa Dafida hlogong. A tšea dithebola tše ntši motseng woo.

3Batho ba motse woo a ba khuduša a ba iša disageng le mo meepong ya ditshipi. A dira ka mokgwa woo metseng ka moka ya Baamoni; ya ba gona a boelago Jerusalema le setšhaba ka moka.

4Ka morago gwa tsoga ntwa le Bafilisita kua Gesere. Mohla woo Sibekai wa Husa a bolaya Sipai e mongwe wa leloko la megwanggwang, mme a ba kokobetša.

5Ye nngwe gape ntwa ya lwewa le Bafilisita. Elihanana morwa wa Jairi a bolaya Lahemi monnago Goliata wa Gathi, yo theko ya lerumo la gagwe e bego e lekana le mpheng wa mogoma.

6Ntwa ye nngwe gape ya lwewa kua Gathi. Gona moo go be go na le monna e motelele e a bego a na le menwana e selelago ya diatla le ya dinao, ka moka e be e le menwana e masome a mabedi a metšo e mene. Le yena e be e le wa metswalo ya ba megwanggwang.

7Yena yo a goboša Isiraele; Jonathane morwa wa Simea ngwanabo Dafida a mmolaya.

8Bona ba e be e le ba metswalo ya ba megwanggwang ba Gathi; ba bolailwe ke Dafida le bahlanka ba gagwe.