BAROMA 14 - Northern Sotho 1951/1986（NSO51）

Modumedi a se ke a kgopiša bafokodi

1Mofokodi tumelong le mo amogeleng, e se gore le tšee kgang ka diila.

2E mongwe o dumela go ja tšohle; mofokodi o fo ja merogo.

3E a jago a se ke a nyatša eo a sa jego. E a sa jego a se ke a ahlola eo a jago; hleng Modimo o mo amogetše.

4Wena o mang ge o itira moahlodi wa molata wa e mong? Ge a ema o emela mong wa gagwe; ge a ewa o wela mong wa gagwe; gomme o tlo ema gobane mong wa gagwe o na le maatla a go mo emiša.

5E mongwe o bona letšatši le lengwe e le le legolo; e mongwe a tla a re matšatši a a lekana. A motho a tsebe se a se kgodilwego e le nnete.

6E a hlaolago letšatši le go ikona, o le hlaolela Morena; e a sa hlaolego letšatši a ja, le yena o direla Morena ka go se hlaole letšatši. E a jago, le e a sa jego, bohle ba direla Morena, mme ba mo leboga.

7Gobane mo go rena wa go iphelela ga a gona; le wa go ikhwela ga a gona.

8Ge re phela re phelela Morena; ge re ehwa re hwela Morena. Re ba Morena ge re phela; le ge re ehwa re ba gagwe.

9Ke tšona tše Kriste a hwetšego tšona mme a tsoga a phedile, gore a be Morena wa bahu le wa ba phelago.

10Gomme wena o reng ge o ahlola ngwaneno? Ke buša ke re: Gomme wena, o reng o nyatša wa geno? Hleng ka moka re tlo ema re lebane le sedulo sa kahlolo sa Kriste!

11Gobane go ngwadilwe gwa thwe: Ke enne ka nna ke phelago, ka re: matolo ka moka a tlo nkhunamela. O realo Morena. Maleme ka moka a tlo tumiša Modimo.

12Sedio ge, motho mang le mang wa rena o tlo iphetolela pele ga Modimo.

13Ke gona, a re se hlweng re ahlolana; go kaone ge le ka ahlola la re: motho a se ke a kgopiša ngwanabo a mo uša.

14Ke a tseba, gomme ke kgodilwe ka Morena Jesu, ge go se seila sa go ilwa ka baka la sona seng; e ba seila ka eo a se ilago.

15Bjalo ge ngwaneno a hlokofatšwa ka se wena o se jago, gona ga o sa ya ka lerato. O se ke wa mo timetša.

16Le se ke la nyatšiša bjona botse bja lena.

17Gobane mmušo wa Modimo ga se go ja le go nwa, ke toko le khutšo le thabo ka Moyamokgethwa.

18E a direlago Kriste a na le tšona tšeo, o kgahla Modimo, o botwa ke batho.

19Ke gona a re phegeleleng tše re kago khutšišana ra agišana ka tšona.

20Modiro wa Modimo o se ke wa o senya ka baka la dijo. Ga go se se ilago; fela, e ka ba sebe ge motho a ka se ja mme ya ba kgopišo.

21Ke mo go botse ge o sa je nama, o sa nwe sedila, o lesa se se kgopišago ngwana weno.

22Tumelo ye o nago nayo, a e be go itumelela pele ga Modimo. Wa lehlogonolo ke eo, yo e rego ge a iphetleka, a se hwetše se a kago ipea molato ka sona.

23Ge e a belaelago a eja, o oba molato ka ge a eja a se na tumelo. Gomme tšohle tše di sa tšwego tumelong ke sebe.