1Manase o be a na le nywaga e lesome le metšo e mebedi ge a thoma go buša; a fetša nywaga e masome a mahlano a metšo e mehlano a le kgoši motseng wa Jerusalema. Leina la mmagwe e be e le Hefsiba.
2O dirile tše di bego di befela Morena ka go etša ditšhaba tše Morena a kilego a di leleka ge Baisiraele ba fihla.
3O tsošitše meboto yela ye Hiskia tatagwe a bego a e phušotše, a agela Baali dialetare, adira kokkwane ya Ašera, a etša Ahaba kgoši ya Isiraele, a khunamela makoko a legodimo ka moka, a a hlankela.
4A aga dialetare mo Ngwakong wa Morena, wo Morena a o boletšego a re: Jerusalema ke mo ke tlogo bea leina laka!
5Makoko ohle a legodimo o a agetše dialetare mo malapeng a mabedi a Ngwako wa Morena.
6Morwa wa gagwe o mo išitše mollong, a ya ka bonoge, le ka boloi, a bea ba maphalo le ba didupe; a dira tše ntšhi tše di befetšego Morena, a mo rumola.
7A dira seswantšho sa Ašera se se betlilwego, a se tsema mo Ngwakong wa Morena, wo Morena a o boletšego le Dafida le Salomo morwa wa gagwe a re: Mo Ngwakong wo, fa motseng wa Jerusalema, wo ke o kgethilego mo melokong ka moka ya Isiraele, ke mo ke beago leina laka ka go sa felego.
8Maoto a Baisiraele nka se ke ka a khuduša mo nageng ye ke e neilego botatabo, ge fela ba ka hlokomela ba dira tšohle tše ke ba laetšego tšona, le melao yaka ye ke e laetšego Moše mohlanka waka.
9Fela, ba ganne go kwa; Manase a ba aroša, ba dira bobe ba fetiša ba ditšhaba bao Morena a ba fedišitšego mola Baisiraele ba fihla.
10Morena a ba a bolela ka baporofeta bahlanka ba gagwe a re:
11Manase kgoši ya Juda o dirile makgapha a, a dira bobe bjo bo fetišago bobe bjo bo bego bo dirwa ke Baamoro kgale, a diriša le Juda dibe ka medimo ya gagwe.
12Bjale Morena Modimo wa Isiraele o re: Tsebang gore ke nna ke tlišago kotsi e tlogo wela Jerusalema le Juda, ye ba ba tlogo e kwa ge e bolelwa, ba kwa e ba tsirinya ditsebeng ka dipedi.
13Motse wa Jerusalema ke tlo o ela ka lenti le le etšago a Samaria. Jerusalema ke tlo o fala wa mogopo, ge ba o fala mme ba o ribega.
14Mašalela a naga yaka ke tlo a lahla, ka a gafela seatleng sa manaba a bona, gore ba hlakolwe ba be dithebola tša manaba a bona ka moka.
15Ka gobane ba dirile tše di mpefelago, ba nthumotše e sa le mola ba thoma mola botatabo ba khuduga Egipita, le nankhono.
16Le gona Manase o tšholotše madi a mantšintši a se nago molato; motse wa Jerusalema wa tlala ona thoko tšohle; go sa balwe dibe tša gagwe tše a rutilego Juda ka tšona go senya, gore ba dire se se befelago Morena.
17Ge e le ditaba tše dingwe tša Manase, le tšohle tše a di dirilego, le dibe tše a sentšego ka tšona, naa ga di a ngwalwa mo pukung ya ditaba tša kgale tša dikgoši tša Juda?
18Gomme Manase o ithobaletše le botatagwe; o bolokilwe serapeng sa ngwako wa gagwe, serapeng sa Usa; legatong la gagwe gwa buša Amoni morwa wa gagwe.
19Amoni o be a na le nywaga e masome a mabedi ge a eba kgoši, a fetša nywaga e mebedi a buša motseng wa Jerusalema. Leina la mmagwe e be e le Mesulamethe morwedi wa Harusi wa Jotoba.
20O dirile se se befetšego Morena a etša Manase tatagwe.
21A tšea ka tsela ye e bego e swerwe ke tatagwe, a hlankela medimo e šele ye tatagwe a bego a e hlankela, a e khunamela.
22A tlogela Morena Modimo wa botatagwe, a lahla tsela ya Morena.
23O rerilwe ka bohwirihwiri ke bahlanka ba gagwe, ba mmolaya a le ngwakong wa gagwe.
24Setšhaba gomme sa bolaya bonabao ka moka ba ba rerilego kgoši Amoni ka bohwirihwiri, sa bea Josia morwa wa gagwe, a ba kgoši legatong la gagwe.
25Ge e le ditaba tše dingwe tša Amoni tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?
26O bolokilwe lebitleng la gagwe la Usa; legatong la gagwe gwa buša Josia morwa wa gagwe.
Who We AreWhat We EelieveWhat We Do
2025 by iamachristian.org,Inc All rights reserved.
