DITIRO TŠA BAAPOSTOLA 12 - Northern Sotho 1951/1986（NSO51）

Lehu la Jakobo. Petro o lokollwa ke Morongwa

1Ka lebaka leo kgoši Herode a iša matsogo go ba bangwe ba phuthego, a ba kwiša bohloko.

2A bolaya Jakobo ngwanabo Johane ka tšhoša.

3Ge a bona di kgahla Bajuda, a iša pele a swara le Petro, e le mehla ya magobe a sa omelwago.

4A mo tlema a mo iša kgolegong, a mo gafela dihlopha tše nne tša bahlabani ba bane ba bane, gore ba mo hlapetše. O be a re o tlo mmea pele ga setšhaba ge monyanya wa Paseka o fetile.

5Petro a letwa kgolegong; phuthegong gwa fela go bewa thapelo e sa kgaotšego, ba mo rapelela.

6Ge go fihlile mohla woo Herode a bego a tlo mo tšweletša kgorong, ka bjona bošego bjoo Petro o be a robetše a bapetše le bahlabani ba babedi, a tlemilwe ka diketane tše pedi. Mojako ka ntle go be go le bahlapetši ba go leta kgolego.

7Gwa tšwelela Morongwa wa Morena, a ema moo; ngwakong gwa phadima seetša. Morongwa a itia Petro lehlakore, a mo tsoša a re: Tsoga ka pela! Mme diketane tša lokologa matsogong a gagwe tša wela fase.

8Morongwa a re: Apara, o tlemelle dieta. Petro a dira bjalo. Morongwa a re: Ikgonare kobo o ntatele.

9Petro a tšwa a mo šetše nthago, a sa tsebe ge tše Morongwa a di dirago di le gona ruri; a re e ka ba pono.

10Ba feta bahlapetši ba pele, le ba bobedi; ge ba tla mojakong wa tshipi o išago motseng, wona wa ba bulegela ka noši. Ba tšwa ba sepela ba fetša mokgotha o tee. Moo Morongwa a mo tlogela.

11Petro ge a phafogetše ruri, a re: Bjalo ke gona ke tsebago gore Morena o romile Morongwa wa gagwe, a ntlhakodiša matsogong a Herode le go tše setšhaba sa Bajuda se di lebeletšego.

12A re a sa eleletša, a fihla ngwakong wa Maria mmago Johane e a reilwego la Mareka. Ke mo go bego go phuthegetše ba bantši ba rapela.

13Petro a opaopa mojakong wa lapa; gwa tla mosetsana, yo leina la gagwe e lego Rode, a theeletša.

14A kwa lentšu e le la Petro, a lesa go bula mojako ka go thaba, a kitima a tsena, a ba botša a re: Petro o eme mojako.

15Bona ba re: O hlakane hlogo! Yena a tiiša a re: Go bjalo! Bona ba re: Gona ke morongwa wa gagwe.

16Ke ge Petro a sa fela a opaopa; ba ba ba bula ba mmona ba tlabegile.

17Petro a ba lekanyetša ka seatla a re ba homole; a ba laodišetša ka mo Morena a mo ntšhitšego kgolegong, a re: Tsebišang Jakobo le bana bešo taba tše! A tloga a ya felo mo gongwe.

18Ge go sele, tšhogo e se be e nyenyane mo go bahlabani, ba re: Go itšeng le Petro?

19Herode ge a re a tlišwe, a mo hloka; a bea baleti molato, a ba bolaya.

A tloga moo nageng ya Juda, a khudugela Kesarea a dula gona.

20Ke ka gobane o be a rata go hlabana le Batiro le Basidone. Fela, bona bao ba lakana ba tla go yena, ba kwana le Blasto letona la mošate, ba loba, ka gobane naga ya bona e be e phela ka tše di tšwago nageng ya kgoši.

21Ka letšatši le le beilwego, Herode a itšhepha ka diaparo tša bogoši, a dula sedulong sa gagwe sa bogosi, a bolela le bona.

22Lešaba la akametša la re: Leo ke lentšu la Modimo; ga se la motho.

23E sa le semeetseng Morongwa wa Morena a mo otla, ka ge go retwa a se go fetišetše go Modimo; a lewa ke diboko a hwa.

24Ge e le lentšu la Modimo, lona la tšwelela pele la enela.

25Baranaba le Saulo ba boa ba etšwa Jerusalema mo ba bego ba išitše dipabalelo tšela, ba tla le Johane e a reilwego la Mareka.