1Ina le botse le phala makhura a mabotse; tšatši la go hwa le phala la go tswalwa.
2Go ya lapeng la monyanya, go phalwa ke go ya lapeng la dillo; le šupa boyo bja batho ka moka; mme e a phelago o a eleletša.
3Nyamo e phala lešego; mahlo ge a lla, pelo e ba e botse.
4Ngwakong wa dillo ke mo go lego pelo tše bohlale; dipelo tša ditlatla di ngwakong wa mathabo.
5Go kwa tsholo ya mohlale go phala go kwa koša ya mašilo.
6Go sega ga lešilo go etša go rathaša ga meetlwa ge e bešetšwa; le gona ke lefela.
7Ruri tšhego, le mohlale e ka šilofatša; tsogolekobong le senya pelo.
8Phethego ya taba e phala mathomo a yona; mokgotleledi o phala moipoti.
9Se phake go selekega ka pelong; tshelekego e agile mo pelong ya setlatla.
10Se re: Mehla ya bjalo e reng e phalwa ke ya kgale? Yo bohlale ga latiše tšeo.
11Bohlale ke bolo, bo etša bohwa; ba ba bonago letšatši ba re ke lehumo.
12Moriting wa bohlale ke moriting wa lehumo; se segolo mo tsebong ke ge bohlale bo phediša mong wa bjona.
13Setša tiro tša Modimo; ge a obamiša go ka obamolla mang?
14Mohla wa mahlatse o thabe; ka mohla o mobe o lebelele; mehla ka moka e dirwa ke Modimo, gore motho a se tsebe tše di tlago.
15Tše tšohle ke di bone phelong bja ka bja lefela. Go na le moloki molobatokong; go na le yo kgopo molalamabokgopong.
16O se ke wa itira moloki wa paala; o se ke wa itira mohlalefi wa bopadi. O tlo ba o itshenyetšang?
17O se ke wa itira yo mobe ka go fetiša, o se be lešilo; o tlo ba o hwelang e sešo ya ba letšatši la gago?
18Ke mo gobotse ge o swara se, mme o se lese sela; e a tlogo tšwa go tšohle ke mošia-Modimo.
19Bohlale bo fa motho maatla go phala bagolo ba lesome mo motseng.
20Ruri mo faseng ga go mothomoloki modiratšebolo e a sa dirego sebe.
21Le gona o se ke wa ya le mantšu ka moka a batho ba a bolelago, o se tlo kwa ge mohlanka wago a go roga;
22Gobane pelo ya gago e tseba gobane ke gantši le wena o roga ba bangwe.
23Tšeo ka moka ke di fenyekile ka bohlale, ka re ke hlalefe; fela, ka hwetša bo le kgole le nna.
24Tše di lego gona di kgole, di kua fasefase; di ka hwetšwa ke mang?
25Ka lebaleba, ke na le pelo ya ka, ka re ke tsebe, ke nyake bohlale le temogo. Ka re ke tsebe ge bobe e le botlatla, ge bošilo e le boota.
26Ka hwetša se se fetišago lehu go galaka e le mosadi wa pelo e lego moreo le moutlo Yo atla tša gagwe e lego ditlemo, go tlo phonyokga mokgahla-Modimo; modiradibe o tlo tanywa ke yena.
27Mmoledi o re: Phakgama! Nna ke di bone ka setee ka setee ka hlalefa.
28Se pelo e se nyakilego ya se hloka sese: Mo go batho ba sekete monna ke bone o tee; ge e le mosadi, mo go bao bohle ka mo hloka.
29Se ke se hweditšego ke setee; sese: Batho, Modimo o ba dirile baloki; ke bona ba ba nyakago mahlale a mantši.
Who We AreWhat We EelieveWhat We Do
2025 by iamachristian.org,Inc All rights reserved.
