1Jobo a fetola a re:
2Ka kgonthe, batho ke bolena; mohla le hwago, le bohlale bo tlo ba bo hwile.
3Fela, le nna ke ne pelo boka lena; ga le na se le mphetago ka sona. Dilo tšeo di ka šita mang?
4Nna ke fetogile wa go kwerwa ke ngwanešo, nna ke bego ke rapela mme ka kwewa ke Modimo; go kwerwa nna moloki le sethakga.
5Madimabe a nyatšwa ke yo a kwago bose; o re: A beetšwe ba dinao tše di thelelago.
6Metse ya mahodu e na le malao; boiketlo bo go bao ba lwago le Modimo, bao Modimo a išago dilo mo atleng tša bona.
7Upša o botšiše diphoofolo, di go rute; botšiša dinonyana tša godimo, di go botše.
8Bolela le lefase, le go rute; le hlapi tša lewatle di go hlalosetše.
9Dilo tše, ke mang a sa bonego mo go tšona ge di dirilwe ke seatla sa Morena?
10Bophelo bja diphedi tšohle bo mo atleng tša gagwe, le moya wa mo mebeleng ya batho bohle.
11Tsebe e hlaloganya dipolelo; go tsefago dijo ke ka mo ganong.
12Bohlale bo go hlogotšhweu; tlhaloganyo e tla ka bontši bja matšatši.
13Bohlale le maatla di mo go yena; maano le temogo ke tša gagwe.
14Hleng a phušola, go ka se hlwe go agwa; a tswalelela motho, ga go sa tlo bulwa.
15Hleng a thibela meetse, a a gopa; ge a ka a lesa, a gogola naga.
16Go yena ke mo go lego maatla le bobabaledi; motimedi ke wa gagwe, le yena motimetši.
17Ba dikala o ba raka ba hlakotšwe; o šilofatša baahlodi.
18O tlemolola tlemo tša dikgoši; a di tlema matheka ka thapo.
19Bomphamodimo o ba tloša ba hlakotšwe; le ba maatla o a ba uša.
20Ba ba botilwego o ba šitiša go rera; le bagolo o ba amoga temogo.
21Bakgoma o ba tšhilafatša ka nyatšego; bagale o ba amoga ditlhamo.
22O utolla madiba a leswiswi; le thiti ya lehu o e ntšhetša seeding.
23Ditšhaba o a di godiša, a buše a di senye; ditšhaba o a di atlatša, a buše a di khuduše.
24O thopa pelo ya babuši ba dilete tša mafase, a ba dira baneneri ba mahanateng, mo go sego tsela.
25Ba phapharega mo swiswing go sego seetša; ba hlahlarega boka ba ba builwego.
Who We AreWhat We EelieveWhat We Do
2025 by iamachristian.org,Inc All rights reserved.
