DIPSALME 101 - Northern Sotho 1951/1986（NSO51）

Sefela sa botho le tokoSefela sa Dafida.

1Ke hlaba sefela sa botho le toko; ke wena Morena yo ke mminelago.

2A nke ke ithute tsela ya go loka. O tlo tla neng go nna? Ngwakong wa ka ke itshepelela ke le wa pelo e se nago bosodi.

3Mahlo a ka nka se a lebanye le ditaba tše mpe; ke hloile ditirokgopo; di ka se ke tša nkgomarela.

4Pelompe a e be kgole le nna, bobe ke se bo tsebe.

5Mopharawagabo thopeng ke tla mo theola; ga ke kgonane le wa mahlo a go ikgantšha le wa pelo ya go ipota.

6Mahlo a ka a nyaka babotegi mo nageng, gore ke agišane nabo; ke direlwa ke e a swerego ka tsela ya go loka.

7Wa go dira tša bofora ga a dule ngwakong wa ka; wa maaka a ka se eme a lebana le nna.

8Ka mehla e sa le bosasa ke tlo theola ba go senya naga, ya ba go fediša ba go dira dibe mo motseng wa Morena.