DIEMA 28 - Northern Sotho 1951/1986（NSO51）

Diema tša Salomo

1Ba babe ba tšhaba, go se e a ba rakago; baloki ba iketla boka tau ya ledumaedi.

2Naga e senyega ka tlhanogo ge bogoši bo bakiwa; e lala galelele go na le ba tlhaloganyo le ba tsebo.

3Mmuši mohlakišababotlana, ke pulakgogola e se nago dijo.

4Bahlalamolao ba reta disenyi; balotodi ba molao ba lwa nabo.

5Batho babe ga ba hlathe toko; ba ba nyakago Morena ba lemoga tšohle.

6Modiidi ge a swere tsela ya go loka, o phala mohumi wa go kgopamiša tsela.

7Ngwana wa tlhaloganyo o lota molao; mohlwaleditagwa o leša tatagwe dihlong.

8Wa go ikhumiša ka kadimo ya go ja ba bangwe, o kgobelela eo wa go tlo setša babotlana.

9Tlhalamolao, le thapelo yagwe ke makgapa.

10E a gokelago ya bolo ditseleng tša bobe, moreong wa gagwe go tlo wela yena.

Bailabosodi ba ja lefa le le botse.

11Monna wa mohumi o re: Ke mohlale! O hlathwa ke mmotlana wa tlhaologanyo.

12Mohla go hlalala ba baloki, ke ge bokwala bo godile; ge go tsogile ba babe, batho ba a utama.

13Mmipadikarogotšagwe ga a letlege; go tlo gaugelwa e a ipegago mme a lahla dikarogo.

14Wa lehlogonolo ke mohlwaaboifa; moithatafišapelo o tlo wela bošuleng.

15Mmuši e mobe, ge a buša babotlana, ke tau e bopago, ke sebata se se bolayago.

16Mokgomamohlokakelello o bata go hlakiša batho; moilamegabaru o tlo phela galelele.

17Motho wa moetlo wa madi, o tlo tšhaba go fihla lebitleng; se mo thibeleng.

18Moswaratselayagoloka o tlo phologa; madikadike wa tselapedi, o tlo wa go e nngwe.

19Moitemelatšhemo o tlo ja bogobe; molatamafela o tlo khora tšhego.

20Monnammotegi o tlo huma tšhegofatšo; mothakanelakhumo molato ga a o hloke.

21Go emelela motho sepitša ga go botse; le wa go rekwa ka thatana ya bogobe o gona.

22Motho wa ihlo la megabaru o kganyelela go huma; ga a tsebe ge a tlo tlelwa ke bohloki.

23Mosolabatho o tlo ba a ratwa, gwa nyatšega wa leme la boreledi.

24Mohlakolatatagwelemmagwe, a re: Ga se sebe, ke wa gabosehlola.

25Wa megabaru o tsoša ntwa; e a tlo go khora ke e a botago Morena.

26Moipoti ke setlatla; go phonyokga e a yago ka bohlale.

27Tlhallabadiidi a ka se ke a ba a hloka; moitšhiramahlo o tlo kwa mašapa a mantši.

28Mohla go tsogile ba babe, batho ba a utama; ge ba babe ba senyega, baloki ba a ata.