NAHUME 1 - Northern Sotho 1951/1986（NSO51）

Ke Ninife mošate wa mmušo wa Asuri o bolelwago fa

1Lentšu le ela Ninife. Lengwalo la pono ya Nahume wa Elikowe.

2Morena ke Modimo yo bogale; ke yena Molefetši. Morena ke Molefetši! Morena ke Molefetši! Ke yena Rabogale ge a lefetša manaba a gagwe; ba ba mo hloilego a ka se lese go ba otla.

3Morena ke wa pelo e telele; fela, maatla a gagwe ke a magolo. Ga a lese wa molato a sa otlwe. Morena tsela ya gagwe ke ya sesesedi le ledimo; maru ke lona lerole la nao tša gagwe.

4O kgalema lewatle a le pšheša; o gopiša dinoka tšohle, gwa oma naga ya Basane le thaba ya Karamele, gwa oma le matšoba a Libanoni.

5Dithaba ge di šišinyega, meboto ge e roromela, di tšwa go yena. Ge a fihla, naga e a tekateka, le thetebudi ya lefase, le bohle ba ba agilego mo go lona.

6Ge a galefile, go ka ema mang? Ge a tuka bogale, go ka tsoga mang? Kgalefo ya gagwe e tšhologa boka mollo; le mantšwe ge a pharoga, di tšwa go yena.

7Morena ke yo botho; ke yena setšhabelo mohla wa tlalelo; mme o tseba ba ba mmotilego.

8Ba ba mo rumolago o ba fetša ka mafula a a gogolago. Manaba a gagwe o a hlomarela ka leswiswi.

9Le tlo loga maano mang a go lwa le Morena? Ge a fedišitše, ke moka; kotsi yeo ga e boeletše.

10Ka gobane ba yo phereketšwa ke meetlwa; ba tlo etša ba ta tagilwego ke sedila; ba tšhungwa bjalo ka dihlaka tše di omilego ruri.

11Go wena go tšwele e a rerilego go lwa le Morena, e a logilego maano a borumolane.

12Morena o re: Le ge ba ipotile, ba atile o bjalo, ba tlo gogolwa ba senyega ba le bjalo. Gomme ge ke go kokobeditše, nka se ke ka hlwa ke go kokobetša.

13Bjale joko yagwe, ke tlo go rola yona ka e thokga, ka ripa ditlemo tša gago.

14Ge e le wena Ninife, Morena o laetše e re: Leina la gago le ka se hlwe le etšwa peu; ngwakong wa modimo wa gago ke tlo fediša pheko le diswantšho tša medimo, ka go epela lebitla ka ge o gobogile.