DIPSALME 102 - Northern Sotho 1951/1986（NSO51）

Sello sa ba ba thubilwegoThapelo ya motlaišegi, ge a nyamile pelo, mme a bobolela Morena mahloko a gagwe.

1Morena, kwaa thapelo ya ka, mme lentšu la ka a le go fihlele ge ke goeletša.

2Se nkgerule mohla ke tlaletšwe; o ntshekegele tsebe ge ke go bitša; o se ntiegele.

3Gobane bophelo bja ka bo tloga boka muši; marapo a ka a fiša bjalo ka leretha.

4Pelo ya ka e swile, e omeletše bjalo ka mabjang; ke bile ke lebala go ja dijo tša ka.

5Nama ya ka le marapo a ka di kgomarelane, ka go hlwa ke rotla.

6Ke bjalo ka mogole lešokeng, ke etša leribiši maropeng.

7Ke hloka boroko; ka bodutu ke etša nonyana tlhakeng ya ntlo.

8Manaba a ka a hlwela go nkgoboša; bampeki ba roga ka nna.

9Ke ja molora bjalo ka bogobe; tše ke di nwago di tswakane le megokgo.

10Ke ka gobane o befetšwe mme o galefile; gobane o ntšere wa ntigela fase.

11Matšatši a ka a swana le meriti ge e gonogile; ke omelela bjalo ka mabjang.

12Mme wena Morena o dula o le gona neng le neng; o wa go tsebja go ya go ile.

13Tsoga o gaugele motse wa Tsione, gobane lebaka la go o šokelwa ke lona le, le tlile.

14Gobane balata ba gago ba rata merako ya wona; ba nyama ge o phušogile.

15Baditšhaba ba tlo ba ba šia leina la Morena, mme dikgoši tša lefase di tlo ba tša šia tago la gago,

16Mohla Morena a aga motse wa Tsione, ge a bonala ka tago la gagwe.

17O tlo phafogela dithapelo tša dišuana; dithapelo tša bona a ka se di nyatše.

18Tšona tše a di ngwalelwe ba meloko e sago tla; setšhaba se se tlogo bopša se rete Morena.

19Gobane, a le bodulong bja gagwe bja bokgethwa kua tletlolo, o di ukametše; Morena o šetša lefase a le kua magodimong,

20Gore a kwe diphegelo tša batlengwa, a hunolle bana ba lehu.

21Gore leina la Morena le bolelwe fa Tsione, a retwe fa Jerusalema,

22Mohla go tlogo bothwa ba ditšhaba tšohle, mohla yena Morena a tlogo hlankelwa ke magoši.

23O robile maatla a ka ke sa le tseleng, o ripa bophelo bja ka.

24A nke ke re: Modimo wa ka, o se ntloše ke sa ya setšeng sa bophelo bja ka; ya gago nywaga e dula e le gona neng le neng.

25Ke neng ya mola o thea lefase, ya mola diatla tša gago di dira magodimo.

26Mme tšona di tlo ba tša loba, wena wa šala o le gona. Di tlo ba tša onala boka kobo, wa di šatola boka seaparo ka moka ga tšona, tša fetoga.

27Wena o dula o le gona, mme nywaga ya gago e ka se ke ya ba ya fela.

28Bana ba balata ba gago ba tlo aga ba dula; mme peu ya bona e tlo dula e le gona pele ga gago.