HESEKIELE 2 - Northern Sotho 1951/1986（NSO51）

Hesekiele o fiwa boporofeta

1A bolela le nna a re wene ngwana motho! Ema ka maoto ke bolele nago.

2Ge a realo, ka tlelwa ke moya; wa nkemiša ka maoto, ka kwa e a bolelago le nna a re:

3Ngwana motho! Nna ke go roma go Baisiraele, go setšhaba se sa bahlanogi ba go ntlhanogela, ba go ntahla gotee le botatabo go fihla tšatši la lehono le.

4Ke bana ba difahlogo tše thata le ba dipelo tše di reteletšego. Ke go roma go bona gore o bolele nabo ka go re: Mong wa bohle o re!

5Gore bona, le ge ba ka kwa, le ge ba ka gana e le ba moloko wa dinganga, ba fele ba tsebe gobane ba be ba na le moporofeta.

6Mme wene ngwana motho, o se ke wa ba boifa; o se boife se ba se bolelago; ge o ba hwetša ba etša ditshehlo le meetlwa, eke o dutše gare ga diphepheng, o se boife dipolelo tša bona, o se tšhoge difahlogo tša bona; gobane ke moloko wa dinganga.

7O fele o ba botša dipolelo tša ka, le ge ba ka kwa, le ge ba ka gana e le ba moloko wa dinganga.

8Mme wene ngwana motho, o kwe se ke go botšago sona; o se ke wa nganga bjalo ka moloko wo wa dinganga. Bjale ahlama o je se ke go neago sona.

9Ge ke lebelela ka bona go fihla seatla go nna se swere lengwalo le le mennwego.

10Sa le menolla ke lebeletše, ka hwetša le ngwadilwe ka teng le ka ntle, le ngwadilwe tša dillo le tša diphegelo le tša mahlomola.