DIPSALME 90 - Northern Sotho 1951/1986（NSO51）

PUKU YA BONEModimo wa mehleng o botilwe ke batho ba go hwaThapelo ya Moshe monna wa Modimo.

1Mong wa bohle, setšhabelo sa rena ke wena melokong ya kgalelele le nankhono.

2O wa mola dithaba di sešo tša tswalwa, wa mola naga le lefase di sešo tša tšweletšwa, wa mehla e se nago mathomo, e se nago mafelo; o Modimo.

3Motho o mmušetša leroleng; o re: Hee bana ba batho boang!

4Gobane nywaga e sekete mo go wena eke ke letšatši la maabane ge le fetile; eke ke tišo ya bošego.

5O a ba gogola, ba etša thobalo bosasa, ba etša bjang ge bo hlogile;

6gosasa bo mela bja taga, bja napa bja pona; mantšiboa bo a segwa, bo a oma.

7Gobane re fetšwa ke bogale bja gago; re tšhoga mohla o befetšwe.

8Dibe tša rena o di beile pele ga gago; dithopa tša rena di seetšeng sa mahlo a gago.

9Matšatši a rena a fela ka moka ka ge o befetšwe. Nywaga ya rena e ile bjalo ka kgopolo.

10Bophelo bja rena ke nywaga e masome a šupago; go yo thata ke masome a seswai. Mme segolothata mo go yona ke tapišo le tshwenyego; gobane bo feta ka pela eke re fofa ka diphego.

11Kgalefo ya gago bothata bja yona bo tsebja ke mang a tšhoga pefelo ya gago ka mo go e swanetšego?

12Re rute go bala matšatši a rena, re fiwe pelo tše bohlale.

13Boa Morena! O tlo iša kae? Šokelwa bahlanka ba gago.

14Re horiše botho bjago e sa le ka meso, re thabe re hlalale re sa phela.

15Re fe lethabo; o le lekanye le mehla ya mola o re kokobetša, o le lekanye le nywaga ya mola re rwele bothata.

16Bahlanka ba gago a ba bone ditiro tšago, le bana ba bona ba bone borena bja gago.

17A botho bja Modimo Mong a rena bo dule bo re okametše. Mediro ya atla tša rena o re tiišetše yona; mediro ya atla tša rena o e tiiše.