JEREMIA 10 - Northern Sotho 1951/1986（NSO51）

Bošilo bja go itirela medimo

1Kwang lentšu le Morena a le boletšego le lena ba moloko wa Isiraele.

2Morena o re: Le se ke la ithuta mekgwa ya bantle. Le se ke la tšhoga dika tša legodimo; gobane bantle ba tšhoga tšona.

3Gobane mekgwa ya ditšhaba ke ya lefela; ba rema kota ya sekgweng, mmetli a e betla ka seatla, ka selepe.

4Ba manega tshipitshehla, le tshipi e khwibidu, ba e kokotela ka dimapo le ka noto, gore e se kgwehle.

5Di eme bjalo ka sekutu serapeng; ga di bolele, di a kukwa ka gobane ga di kgone go sepela. Le se ke la di boifa; ga di hlokofatše, ga di šetše motho.

6Ga go moka wena Morena, o e mogolo; ina la gago ke le legolo ka maatla a gago.

7Ke mang a ka se kego a go šia, wene Kgoši ya ditšhaba? Ke tšona di go swanetšego; gobane mo go ba bohlale ba ditšhaba tšohle, le go mebušo yohle, ga go moetšawene.

8Ka moka ga bona ke ditlatla le mašilo; thuto yohle ya medimo ke yona kota yeo,

9Ke tshipitshehla ye e batotšwego, e rwelwego kua Tarasisi; ke tshipi e khwibidu ya Ufasi, ke modiro wa mmetli le wa atla tša morudi. Di apešwa purapura e tala le e khwibidu; ka moka ke dibopiwa tša bomakgone.

10Mme Morena ke Modimo wa makgonthe, Modimo e a phelago, kgoši ya mehleng; ge a galefa, lefase le a šišinyega; ge a befelwa, ditšhaba ga di kgone selo.

11Ba botšeng le re: Medimo ye e sa kago ya dira legodimo le lefase, o tlo fedišega mo faseng ka tlase ga legodimo.

12O gona e a dirilego lefase ka maatla a gagwe, a thekga legohle ka bohlale bjagwe, a ala legodimo ka tlhaloganyo yagwe.

13Ge a tsoša lentšu, modumo wa meetse a magodimong, ge a rotošitše meuwane kua go lego dipheletšo tša lefase, ge a dira magadima le dipula, a ntšha ledimo mo a bego a le uta,

14Ke mo batho bohle ba tšhogago ba sa di hlaloganye; morudi yola wa diswantšho tša medimo o lewa ke dihlong, gobane modimo wa gagwe ke maaka, ga o ne moya wa bophelo.

15Ke mafela, ke dibopiwa di segišago; di senyega ge go tla mohla wa tšona.

16Mme yena yo e lego wa Jakobo ga a swane natšo: ke yena Mmopi wa legohle; Isiraele ke wona moloko wo yena e lego mong wa wona. Ina la gagwe ke Morena wa mašaba.

17Tlema thoto yago o e rwale, wena o dutšego o dikilwe.

18Gobane Morena o re: Tsebang gobane ba dutšego nageng ye ke tlo tloga ke ba lahleganya ka gatee; ke tlo ba pitlaganya gore ba di bone.

19Joo nnaa! Ke gobetše! Ke ntšhitšwe ntho e bohloko! A nke ke re ke bohloko bja ka bjo, ke bo kgotlelele.

20Ngwako wa ka o rutlilwe, dipalelo di hlahlamologile; bana ba ka ba ntlogetše, ga ba sa le gona; ga ke sa ne wa go ka tsoša ngwako wa ka mme a o rulela.

21Gobane badiši ba dirile tša bošilo, ba lesa go nyaka Morena. Bjale ga ba kgone selo; mohlape wa bona ka moka o gašane.

22Soo modumo, o kwala o etla, e le mašata magolo kua thoko ya leboa. Ke a go tlo dira metse ye ya Juda lehanata, letšaba la phukubje.

23Morena, ke a tseba; motho tsela yagwe ga e buše; le monna mo a yago ga ikiše, le ge a gata a tiiša.

24Morena, nkotle ka mo go ntekanego; se nkotle o befetšwe, ke se tlo notlega.

25Bogale bja gago bjona bo thenolele go bantle, ba sa go tsebego, le go tšhaba tšeo di sa rapelego ina lago; gobane ke tšona di llego Jakobo; di mo meditše, tša phekgola madulo a gagwe ya ba lehanata.