DIPSALME 38 - Northern Sotho 1951/1986（NSO51）

Thapelo ya go itsholaSefela sa Dafida sa kgopotšo.

1Morena, se nkotle o sa galefile; o se ntshole o befetšwe.

2Gobane mesebe ya gago e ntlhabile; ke hlabilwe ke seatla sa gago.

3Mmele wa ka ga o sa na mo go kwago bose ka ge o befetšwe; ga ke sa na setho se kago iketla, ge ke bona dibe tša ka.

4Gobane melato ya ka e nthibegetše hlogo; e nthoba bjalo ka morwalo o boima.

5Ke nkga dišo di kekago, ka ge ke dirile tša bošilo.

6Ke hunyapane kudu, mme ke inamile, ke hlwa ke itshepelela ke nyamile.

7Bohloko bo nkgama dinoka; mmele wa ka ga o sa na mo go kwago bose.

8Maatla a mpheletše; ke robegetše ruri; ke bobola ke hlokogile pelo.

9Mongaka! Tlhologelo ya ka ka moka o a e tseba; le phegelo tša ka ga tša utagala pela gago.

10Pelo ya ka e a tula; maatla a ka a ntlogile; le mahlo a ka ga a sa na seetša.

11Bagwera ba ka le ba gešo ba fo nkema kgole; ba bona bolwetše bo nkwetše; le bana bešo ga ba batamele.

12Gomme ke theilwe ke ba ba rego ke hwe; ke lakanwa ke ba rego ba ntlholele kotsi; ba hlwa ba loga maano a mabe.

13Gomme nna ke etša sefoa, ga ke kwe; ke etša semuma se sa bolelego.

14Ke etša monna e a sa kwego, yo go sego boiphetolelo molomong wa gagwe.

15Gobane ke letetše wena Morena; ke wena o tlogo nkwa, wena Mong a ka, Modimo wa ka.

16Gobane nna ke be ke re: A ba se thabe ka nna, ge dinao tša ka di ka thedimoga; a ba se ikgantšhe ka nna.

17Gomme nna ke šetše ke le wa go tlo wa; ke hlwa ke lebana le bohloko bja ka.

18Ge e le molato wa ka, ke bile ke ipegile; mme ke šulafetše ka ge ke le wa dibe.

19Fela, manaba a ka a a phela, a tiile; ba ba fogo ntlhoya ba atile.

20Ba a ntlhokofatša, mola nna ke ba thakgile; ba mpeka ka gobane ke latela tše dibotse.

21Morena, se ntlogele; Modimo wa ka, o se nkeme kgole.

22Morena, akgofa o nthuše, Mong a ka Mophološi wa ka.