1Setšhaba ka moka sa Juda sa tšea Usia, mola a sa na le nywaga e lesome la metšo e selelago, sa mo dira kgoši legatong la Amatsia tatagwe.
2Yena o agile merako ya Elathe, gobane o be a bušeditše motse wo go Juda mehleng ya ge Kgoši Amatsia a ithobaletše le botatagwe.
3Usia mola a thoma go buša o be a na le nywaga e lesome la metšo e selelago, a fetša nywaga e masome a mahlano a metšo e mebedi a le kgoši motseng wa Jerusalema. Leina la mmagwe e be e le Jekalia wa Jerusalema.
4O dirile tše di bego di kgahla Morena, a etša Amatsia tatagwe.
5E be e le motho e a nyakago Morena mehleng ya ge Sakaria a mo ruta go boifa Modimo. Gomme mehleng yeo ge a sa nyaka Morena, Modimo o be a mo atla.
6A tšwa dira a lwa le Bafilisita, a phušola merako ya Gathe, le merako ya Jabine, le merako ya Asidodo, a aga metse e mengwe gona moo Asidodo nageng ya Bafilisita.
7Modimo o mo thušitše go lwa le Bafilisita, le Baarabia, le ba ba agilego Guru-Baali le Bameuni.
8Le Baamoni ba be ba ntšhetša Usia dibego; leina la gagwe la tuma le kua Egipita, gobane o be a tiile maatla gagolo.
9Ke yena Usia a agilego merako ya dibo tša Jerusalema mo kgorong ya sekhutlong, le mo kgorong ya moeding, le ya mo dikhutlong tša merako, a di tiiša.
10Le kua lešokeng a aga dibo, a epa didiba tše ntši tša meetse, gobane o be a na le dikgomo tše ntši kua melaleng le kua magoleng, le balemi ba mašemo, le babjadi ba merara dithabeng, gobane o be a rata mašemo kudu.
11Usia o be a na le dira tša bahlabani, tše di bego di etšwa ka diphohlaphohla ka palo ye e beilwego ke Jehiele mongwadi, le Maaseya molaki, di laolwa ke Hananya e mongwe wa matona a kgoši.
12Gomme palo ya bakgoma ba meloko mokeng a yona, palo ya bagale, e be e le dikete tše pedi le makgolo a selelago.
13Ke bona ba bego ba laola dira, tše e bego e le banna ba dikete tše makgolo a mararo a metšo e šupago le makgolo a mahlano, banna ba ba feletšego marumong, ba go hlabanela kgoši ge manaba a etla.
14Bona Usia a ba direla dikotse, le dikefa, le diphemo tša tshipi, le mara, le magakabje a diragamabje, tša neelwa dira ka moka.
15Motseng wa Jerusalema a dira melaba ya go betša marumo le maswika a magolo, tša dirwa ka temogo ya bomakgone, tša bewa mo dibong le mo dikhutlong tša merako. Gomme leina la gagwe la tuma go iša kgole; gobane o be a na le mahlatse wa go kgotsiša, a tia maatla.
16Mola a tiile maatla, pelo ya gagwe ya ikgogomoša ya mo iša tshenyegong; a hlanogela Morena Modimo wa gagwe; a ba a tsena Ngwakong wa Morena, a re ke thuntšha diorelo aletareng.
17Moperisita Asaria a mo šala nthago a na le baperisita ba masome a seswai, banna ba dinatla.
18Ba kgala kgoši Usia, ba mo rera ba re: Go thuntšhetša Morena diorelo ga go a swanela wena Usia, gobane beng ba modiro wo ke baperisita barwa ba Arone. Tšwaa mo sekgethweng; o a senya; mme tše bjalo di ka se ke tša go iša mo o tlogo retwa ke Modimo.
19Usia a befelwa a swere moruswi wa diorelo ka seatla; a re a sa befeletše baperisita, a tšwa lephera a sa lebane le bona gona moo Ngwakong wa Morena a eme aletareng ya diorelo.
20Asaria moperisita e mogolo, le baperisita bohle, ge ba mo lebeletše, ba bona lephera le mo tšwile phatleng; ba mo ntšhetša ntle, le yena ka noši a akgofa a tšwa ka gobane Morena a mo otlile.
21Gomme Usia, yena kgoši, a dula e le wa lephera, a ba a hwa a na nalo. O be a dula ngwakong wa thokwana e le wa lephera, a ilwa, a se ye Ngwakong wa Morena. Ke ge Jothama morwa wa gagwe a buša setšhaba sa naga yeo, e le molaki wa motse wa mošate.
22Ge e le ditaba tše dingwe tša Usia, tša ge a thoma a ba a goma, di ngwadilwe ke Jesaya moporofeta morwa wa Amotsi.
23Usia o ithobaletše le botatagwe; ba mmolokile go botatagwe serapeng sa mabitleng a dikgoši, ka gobane ba re: Ke wa lephera; legatong la gagwe gwa buša Jothama morwa wa gagwe.
Who We AreWhat We EelieveWhat We Do
2025 by iamachristian.org,Inc All rights reserved.
