DIPSALME 13 - Northern Sotho 1951/1986（NSO51）

Morena, o tlo nkwa neng?Sa mohlabeledi, sefela sa Dafida.

1Morena, o tlo lesa neng go dula o ntebetše? O tlo kgaotša neng go nkutela sefahlego sa gago?

2Ke tlo khutša neng go ipolokela pelaelo mo pelong, le go hlwa ke kgokgona? Lenaba le tlo lesa neng go rena ka nna?

3A nke o lebelele hle, mme o nkarabele; Morena Modimo wa ka, ediša mahlo a ka, ke se tlo swarwa ke boroko bja lehu.

4Lenaba la ka le se tlo re: Ke mo fentše! Bahloi ba ka ba se tlo hlalala ge ke šutha.

5Ge e le nna, se ke se botago ke botho bja gago; pelo ya ka e tlo hlalala ge o mphološitše, ka hlaba sefela sa Morena sa ge a ntšheditše.