1Lentšu le Morena a le boletšego a ela naga ya Hadirake le Damaseko mošate wa gona, šele: Ka kgonthe, mahlo a Morena a okametše batho le mašika ohle a Isiraele,
2le ba Hamathi ba go fana mellwane le rena, le ba Tiro le Sidone babatamahlale.
3Le ge Tiro go ikagetše merako, go kgobetše tshpitshehla wa maudi, le tshipi e khubedu wa leraga mekgobeng,
4Mong a rena šo, o tlo go thuba; mahumo a gona o tlo a lahlela lewatleng, motse wa tšhungwa ka mollo.
5Ba Asikaloni ba tšhoga ge ba bona tšeo; le ba Gatsa le ba Ekirone ba šia gagolo ba holofologile. Kgoši ya Gatsa e ile; Asikaloni ga go sa dula motho.
6Asikaloni go dula ba mathoko. Maikgantšho a Bafilisita ke tlo a senyetša ruri.
7Mo ganong ga bona ke tlo ntšha nama tša madi: mo menong a bona ke tlo ntšha dijo tše tšhila; le ona mašalela a bona e tlo ba batho ba Modimo wa rena; ba tlo gwerana le Bajuda, mme ba Ekirone ba tlo etša Bajebusi.
8Ntlo ya ka ke tlo e hlapetša, ka raka manaba ge a boaboa; ba ka se ke ba hlwa ba šwahlelwa ke bapateletši, ka gobane bjale ke hlapetša ka mahlo a ka.
9Hlalala gagolo, Morwedi wa Tsione! Kwatša mekgolokwane, Morwedi wa Jerusalema. Se Kgoši ya gago, e tla go wena, Moloki Monamodi. Yena yo bonolo o tla a nametše pokolo, pokolwana namane ya pokolo.
10Mo go ba Efuraimi ke tlo fediša makoloi, le dipitsi, tša Jerusalema; ke tlo roba mara a tlhabano. Bantle o tlo ba begela khutšo; o tlo buša a goma ka lewatle le lewatle, le ka noka le ka kgomo ya lefase.
11Mme wena Tsione, ka madi a kgwerano yago, ke ntšha batlengwa ba gago moleteng o se nago meetse.
12Boelang setšhabelong sa lena bagolegwa baholofedi; le lehono ke le botša ke re: Ke tlo le putsa gabedi.
13Gobane Juda ke mo nganga ka mo dira bora bja ka; Efuraimi ke mosebe wa ka, ke mmeile lešikeng la bora. Hee Tsione, ke tlo tsoša barwa bago, ba lwa le barwa ba ba Jafane; ke go dira rumo la mogale.
14Morena o tlo bonala a le godimo ga bona, mme mesebe yagwe e tlo hlaga boka dikgadima. Morena Mong a bohle o tlo letša phalafala, a tšwa ka ledimo la borwa.
15Morena wa mašaba o tlo ba phemela; ba tlo ja, ba tlo gatakanya magakabje a diragamabje: ba tlo nwa, ba goba bjalo ka ba lego morareng; ba tlo tlala wa meruswi, bjalo ka dikhutlo tša dialetare.
16Morena Modimo wa bona o tlo ba hlakodiša mohla woo, ka gobane e le bona mohlape wa tšhaba sagwe, e le bona ditalama tše di phadimago tša nageng ya gagwe.
17Ka kgonthe, botse bja yona naga e tlo ba bja bogolo; le letago la yona, e lego masogana le banana, ba atlega ka mabele le morara.
Who We AreWhat We EelieveWhat We Do
2025 by iamachristian.org,Inc All rights reserved.
