1Lebaka la ge kome e tswala a o a le tseba? Le la ge tholo e šokwa?
2Dikgwedi tša ge di duša a o di badile, wa tseba letšatši la ge di tswala?
3Ge di tswala di a kudupana, tša kgotlelela ge di šokwa.
4Bana ba tšona ba a tia, ba golela lešokeng; ba tloga ba se hlwe ba boa.
5Pitsi ya naga e leswa ke mang ya itshepelela? Yona yeo thagalekwara, ke mang a e hunolotšego?
6Ke yona yeo ke beilego lešoka bodulo bja yona; lehanata ka re ke legae la yona.
7Yona e nyatša mašata a motse; ga e rate go kwa dikgalemo tša mootledi.
8Mafulo a yona e a nyaka dithabeng, e itsomela tše tala ka moka.
9Nare, a e ka rata go ba mohlanka wa gago? A e ka lala lešakeng la gago?
10Yona nare, a o ka e tlema ya latela tema? A e ka go šala nthago e phophotha makokota mohlakeng?
11A o ka e bota ka ge e ne maatla a magolo, wa e gafela mediro ya gago?
12A o ka e holofela wa re e goroše mabele a gago, wa re e a rwale seboeng sa gago,
13Mpšhe e kgantšha diphego, go se lefego le le botegago, le ge e le lefofa.
14Mae a yona e a šia mo mobung; a alamelwa ke lerole.
15E lebetše gore a ka gatakelwa ka dihlako, a ka pšhatlwa ke diphoofolo.
16Bana ba yona ga e ba ekelele, eke ga se ba yona. Le ge modiro wa yona o ka senyega, ga e belaele selo.
17Gobane Modimo o e gakišitše tlhaologanyo, o e kunne temogo.
18Fela, mohla e phurolla e taboga, e nyatša pitsi le monamedi wa yona.
19A ke wene o neago pitsi maatla, wa hlama molala wa yona ka moetse?
20A ke wene o e tlolatlodišago bokatšie, ge e tšhoša ka go letša dinko?
21E gwaila mobu ka dihlako e kgantšha maatla a yona, ge e ya go gahlana le marumo.
22E ila poifo, ga e tšhoge selo, ga e tšhabe ge e lebana marumo,
23ge kgotlopo e ka kgwelakgwehla dibetša e le mo go yona, ge go phadima tšhoša le lerumo.
24E roromela ka sehutla, e nyatša molala; ga e sa dumela ge e kwa leparapatla.
25Ge go lla kwadi ya marumo e tlo re “Agee!” E kwa monkgo wa tlhabano e le kgole; e kwa dikgalemo tša matona le mekgoši.
26Nong ge e fofa, a ke ka tlhaloganyo yago? Ge e phurolla diphego mme ya leba borwa?
27Ge lenong le akalala, a le romilwe ke wena? Ge le aga sehlaga sa lona makalakaleng?
28Le dula mantsweng, le lala maribeng, kua dintlheng tša dithaba.
29Le le gona kua le hlola dijo tša lona; mahlo a lona a bona tša kgole.
30Bana ba lona ba monoka madi. Mme mo go lego setoto, le lona lenong le gona.
Who We AreWhat We EelieveWhat We Do
2025 by iamachristian.org,Inc All rights reserved.
