JOBO 2 - Northern Sotho 1951/1986（NSO51）

Bolwetši bja Jobo. Mosadi wa gagwe; bagwera ba gagwe

1Ya re ka tšatši le lengwe ge barwa ba Modimo ba tlile ba ema pele ga Morena, Sathane le yena a tla a le gare ga bona, a ema pele ga Morena.

2Morena a mo rera a re: O tšo boa kae?

Sathane a fetola a re: Ke tšo putlaputla lefase ke itshepelela.

3Morena a re: Jobo mohlanka wa ka o mo šeditše? Ka gobane lefaseng ka moka ga go motho e a swanago le yena ka bothakga le go loka, le ka go boifa Modimo, le ka go ila bobe. O sa fela a tieletše bothakga bja gagwe, le ge ke mo hlokofaditše a se ne molato ke tutuweditšwe ke wena.

4Sathane a fetola a re: Letlalo le kgonwa ka letlalo. Motho tše a nago natšo a ka di ntšha tšohle ge a hlekelela bophelo bja gagwe.

5O ko mo iše letsogo o kgwathe mašapo a gagwe le nama ya gagwe, o bone ge a tlo go hlala pepeneneng.

6Ke mo Morena a itšego: Šoo ge; o diatleng tša gago; fela, bophelo bja gagwe o bo setše.

7Sathane a napa a tloga moo pele ga sefahlogo sa Morena, a hlokofatša Jobo ka dišo tše di hlohlonago go tloga lenaong go fihla phogong.

8Jobo a tšea lengeta a ingwaya ka lona a dutše sethobolong.

9Mosadi wa gagwe a bolela le yena a re: A o sa fela o tieletše bothakga bja gago? Laela Modimo o ikhwele!

10Jobo a fetola a re: Wena o bolela bjalo ka lešilo ge le bolela le mašilo. A re ka re go amogela mola Modimo a re fa tše botse, ra tla ra gana go amogela, ge a re fa tše mpe? -- Gomme Jobo ge dilo tšeo di mo wetše tšohle, ga a ka a senya ka molomo wa gagwe.

11Bagwera ba Jobo ba bararo, ge ba ekwa tše bošula tšeo ka moka tše di mo wetšego, ba tla bohle ba etšwa magaeng a bona; gwa tla Elifase wa Themana, le Bilidada wa Sua, le Tsofara wa Naama; ba lakana ba re ba yo hloboga Jobo, ba mo homotše.

12Ge ba lebelela ba se kgojana, ba se ke ba hlwa ba mo tseba, ba hlaboša mantšu ba lla; bohle ba gagola diaparo tša bona, ba tšea lerole ba le akgela godimo, la ba wela dihlogong.

13Ba tla ba dula fase le yena, ba fetša matšatši a šupago le mašego a ona ba sa bolele selo le yena, ka ge ba bona bohloko bja gagwe bo godile ka kudu.