JESAYA 18 - Northern Sotho 1951/1986（NSO51）

Kotlo e tlogo tlela Bakuše. Tshokologo ya bona

1Kotsi e tlo tlela wene nagatumaphego, o lego mošola wa noka tša Kuše.

2O roma batseta ka maselawatle, ba tla ka nokakgolo, le ka magopo a dihlakanoka. -- Sepelang, lena batseta ba lebelo, le boele go setšhaba sa batho ba batelele, ba tlalo le le phadimago, setšhaba sa go boifša go tloga setlogong le nankhono, setšhaba sa maatla a mešifa, bomakatikele, sa naga ya go putlwa ke dinoka.

3Lena baagi bohle ba lefase, badudi ba dinaga; gwa tsengwa sefoka thabeng, le se bone. Ge go letšwa phalafala, le thaetše.

4Gobane nna Morena o mpoditše a re: Ke tlo dula ka iketla, ka lebelela ke le felo ga ka, boka phišo ya mosegare, boka leru la pula punong ge go fiša.

5Gobane e tlo re ge puno e sešo ya ba gona, ge matšoba a sa hlohlorega, mme dienywa e sa le matata, ke mo a tlogo ripa thabe ka mefaka, a ripa makala a a thena.

6Bohle ke tlo ba gafela manong a dithaba, dibata tša naga; manong a fetša selemo a le moo, dibata ka moka tša naga tša fetša marega.

7Mehleng yeo Morena wa mašaba o tlo lobja ka dibego ke setšhaba seo sa batho batelele, ba tlalo le le phadimago, sa go boifša go tloga setlogong le nankhono, sa maatla a mešifa, bomakatikele, sa naga ya go putlwa ke dinoka. Se tlo tliša dibego felo fa go agilego ina la Morena wa mašaba, Thaba-Tsione.