1Lentšu le le boletšwego ke Morena ka Maleaki le ela Isiraele.
2Ke le ratile! O realo Morena. Mme lena le re: O re ratile kang? A ga ke re Esau e be e le yena mogolwago Jakobo? O realo Morena. Mme nna ka rata Jakobo.
3Ge e le Esau ke mo tšwile, ka dira dithaba tša gagwe marope; naga ya gagwe ka e dira ya phukubje tša lešoka.
4Edomo ge a re: Le ge re thubilwe, re a boa; re tsoša marope! Morena wa mašaba o re: Bona a ba age, nna ke tlo phušola. Ba tlo bitšwa Selete sa mašaedi, Setšhaba sehlasiwa-ke-Modimo go ya go ile.
5Mahlo a lena a tlo di bona, la tlo ba la re: Morena ke e Mogolo le kua ntle ga mellwane ya Isiraele.
6Morwa o godiša rragwe; molata o boifa mong wa gagwe. Bjale, nna ke le tatawena, ke godišwa kae? Ke le Mong wa lena, ke boifša kae? -- O realo Morena wa mašaba a era lena baperisita ba le nyatšišago ina la ka. Bjale le re: Leina la gago re le nyatšiša kang?
7Le le nyatšiša ka go tliša bogobe bja ditšhila aletareng. Bjale le re: Re go nyaditše kang? Mola le re: Meruswi ya Morena a ka no nyatšega!
8Ge mo aletareng le tliša se se foufetšego, a le re ga se bobe? Ge le ipega ka se se hlotšago le ka se babjago, a le re ga se bobe? O ko di iše go mokgoma; a di ka mo kgahla? A a ka go iša mahlo? -- O realo Morena.
9Bjalo gee, ge le rapela le etla go Morena le re a le gaugele, mme diatleng tša lena go etšwa tše bjalo, a le re o tlo le iša mahlo? -- Morena wa mašaba o realo.
10A mola e mongwe wa lena a ka tswalela mejako, gore le se hlwe le gotša mello ya lefela aletareng ya ka! Ga ke le thabele! -- O realo Morena wa mašaba. -- Dibego ga ke di rate di etšwa atleng tša lena.
11Ka gobane go tloga Bohlabela go iša Bodikela leina la ka ke le legolo ditšhabeng; mo go fela ina la ka le thuntšhetšwa diorelo, le tlišetšwa dibego tše di nago ditšhila; gobane ina la ka ke le legolo ditšhabeng. -- O realo Morena wa mašaba.
12Mme lena le a le goboša, ge le re: Meruswi ya Morena bjale e ka tšhilafala; le tše di tšwago moo ke dilewa tše di nyatšegago.
13Ge lena le re: Šedi! E fo ba go itapiša! Ya ba go di nyatša, le tliša tša go tšeelwa batho, le tše di hlotšago, le di babjago; ge le tliša dibego ka mokgwa woo, gona Morena wa mašaba o re: A le re nka kgahlwa ke tšona tšeo di etšwa diatleng tša lena? -- O realo Morena. --
14Mofori ke moitlholelakotsi, ya o nago le powana mohlapeng wa gagwe, ye a e enetšego Morena, mme a hlabela mong a bohle ya senyalo. Gobane nna ke Kgoši e kgolo, -- o realo Morena wa mašaba, -- mme leina la ka le boiswa ditšhabeng.
Who We AreWhat We EelieveWhat We Do
2025 by iamachristian.org,Inc All rights reserved.
