1Morena a botšiša Jobo a re:
2Motšeakgang le Yomaatlaohle a o sa re ruta? Mmega-Modimo a a fetole!
3Jobo a fetola a re:
4Ge e le nna, ga ke motho wa selo. Nka fetola kang? Ke swara molomo ka seatla.
5Ke boletše gatee, ga ke sa fetola. Ke boletše la bobedi; ga ke sa boeletša.
6Morena a le ledimong a fetola a re:
7Itleme matheka senna, ke go botšiše o nthute.
8A o sa re ke fošitše, wa re go šaeditše nna, wa re e a se nago molato ke wena?
9A o ne letsogo le le kakago la Modimo? A o ka dumiša medumo bjalo ka yena?
10Gona apara bogolo le borena, o tšhepe ka phadimo le ka letago.
11Tšholla magaba, o uše tšohle tše o bonago di ikgodiša.
12Tšohle tše o bonago di ikgodiša o di inamiše; ba babe o ba gatakele mo ba lego gona.
13Bohle o ba fihle leroleng; difahlogo tša bona o di iše mo di sa hlwego di bonwa.
14Ke mo le nna ke tlogo go reta, ge tsogo la gago le go namoletše.
15O ko bone kubu, ye ke e dirilego, boka le wena ke go dirile, -- e fula bjang wa kgomo.
16O ko bone maatla a nokeng tša yona, le a ditšhika tša mpeng ya yona.
17E otlolla mosela wa etša phata ya morokwana; mme dipotongwane tša dirope tša yona di rarakane.
18Marapo a yona a etša dikota tša mphiri, dikgopo tša yona di etša mapara a tshipi.
19Ke yona ketapele ya ditsela tša Modimo; Mmopi wa yona o e file lerumo.
20Dithaba di ipega go yona ka dijo; diphoofolo tša lešoka di bapala gona moo.
21E hutama moriting wa dihlašana; e khuta ka lehlakanoka mehlakeng,
22Dihlare di e ukametše ka meriti; e boba mo megokareng ya noka.
23Le ge noka e ka tlala, ga e tšhabe; le ge noka e elago e ka tšhologela leganong la yona, ga e tšhoge.
24A e ka swarwa e sa bona? A e ka thulelwa mogala?
25Kwena a o ka e goga ka kgwega? A o ka e tlema mohlagare ka lenti?
26A o ka e tsenya mogala nkong; a o ka phula mohlagare wa yona ka letsolo.
27A o re e ka ba ya go rapela, ya bolela nago ka boleta?
28A o ka lakana nayo, wa e dira mohlanka wa gago ka mehla?
29A o ka e bapadiša bjalo ka nonyana? A o ka e tlema wa e tliša go banenyana bago?
30A e kile ya bapatšwa ke mmapatši, bareki ba segelwa nama ya yona?
31A o ka thulakanya tlalo la yona ka tšhoša? Hlogo ya yona a o ka e goga ka matsogo?
32E iše letsogo, o tsebe tlhabano; o ka se ke wa boeletša.
Who We AreWhat We EelieveWhat We Do
2025 by iamachristian.org,Inc All rights reserved.
