1Bjale wene Jobo, hle theetša se ke se buago, o sekegele mantšu a ka ohle tsebe.
2O tsebe hle ge ke ahlama, go bua la ka leme ganong ga ka.
3Dipolelo tša ka ke tša pelothwii, mme melomo ya ka e tlo go anegela tsebotshekegi.
4Moya wa Modimo o ntirile, mme mohemo wa Yomaatlaohle o mphile bophelo.
5Ge o ka kgona, o tlo mphetola; o eme re lebane difahlogo.
6O tsebe gore le nna ke wa Modimo boka wena; le nna ke bopilwe ka letsopa.
7Ge e le nna, o ka se ke wa hlohlwa ke go ntšhoga, mme morwalo wa ka o ka se go imele.
8Ruri, tše o di boletšego di ntsene ditsebeng; mantšu a dipolelo tšago ke a kwišišitše.
9Ge o re: Ke sekile, ga ke na karogo, -- ge o re: Ke tagile, ga ke na molato, --
10lebelela, ge o re: Modimo o nnyaketše molato, o ntira lenaba la gagwe,
11wa re: o tlemile nao tša ka mo phateng a lotile tsela tša ka tšohle,
12ke mo nna ke rego: Ga o loke; gobane Modimo ke yo mogolo, a fetago batho ka bogolo.
13O reng o mo tsota wa re: Ga a mphetole le ka letee le a le bolelago?
14Gobane Modimo o a bolela gatee, gabedi, gwa se be le a šetšago.
15O bolela ka diloro, ka dipono tša bošego, ge batho ba ile le boroko, ba robetše malaong a bona.
16Ke mo a thibollago batho tsebe, a tiiša tsholo tša go ba sola.
17Gore a gomiše motho modirong, a lahliše monna boikgogomošo;
18gore a efoše moya wa gagwe lebitla, bophelo bja gagwe bo fete lerumo.
19Le gona o a otlwe ke mahloko dilaong, le ka ntwa ya ka mehla mašapong a gagwe.
20Bophelo bja gagwe bja mo hlaswiša dijo, pelo ya gagwe ya ba ya blaswa tše dibose;
21nama ya gagwe ya tloga e se hlwe e bonwa; gwa tšwela marapo, a a bego a sa bonwe.
22Moya wa gagwe wa hlola lebitla, bophelo bja gagwe bja batamela bafediši.
23Ge moo a ka ba le Morongwamohumedi, o tee go ba sekete, wa go bola tše di swanetšego motho eo,
24o tlo gaugelwa a thwe: A a lopologe, a se fologele moleteng, ke bone sa go mo hunolla!
25Ya ba gona nama yagwe e tlogo boela, ya mpshafala, a tlo etša mola e sa le yo mofsa.
26O tlo rapela a kgahla Modimo, a bona sefahlogo sagwe a hlalala; ke gona ge Modimo a re motho eo o lokile.
27Motho a hlaba sefela, mme batho ba mo kwa ge a re: Ke be ke dirile sebe ke hladile toko; mme ka se ke ka dirwa se se bego se ntebane.
28O hunolotše moya wa ka o se fologele moleteng; mme bophelo bja ka bo thabela seetša.
29Tšona tše ka moka, Modimo o di dira motho gabedi, gararo.
30Ya ba go gomiša moya wagwe moleteng, gore a bonegelwe ke seetša sa bophelo.
31Wene Jobo, ntheetše, o homole go bolele nna.
32Ge o ka ba le ditaba, o tlo mphetola, wa bolela; gobane nna ke rata ge o ka tšwa o se ne molato.
33Ge o se ne phetolo, gona kwaa nna, o homole, ke go rute bjona bohlale.
Who We AreWhat We EelieveWhat We Do
2025 by iamachristian.org,Inc All rights reserved.
