1Jobo a iša pele, a ntšha diema tša gagwe, a re:
2Ka Modimo, e a ntahlilego kahlolong, ka Yomaatlaohle, monyamiša pelo ya ka!
3Gobane ke sa buša moya; mme moya wa Modimo o mo dinkong tša ka.
4Molomo wa ka o ka se ke wa bua maaka; le leleme la ka ga le na bomenetša.
5Ke kgole le go le dumela; ke tlo hwa ke sešo ka re: Ke molato.
6Ke nganga ke latola bosodi; ke tiišitše fao; ga ke ne tšatši leo pelo ya ka e kago le sola.
7Motho mobe ke yo e lego naba la ka; e a ntsogetšego, a e be yena sesenyi.
8Gobane mokgelogi o sa holofela eng, ge di kgaotša, Modimo ge a mo amoga moya?
9A modimo o tlo mo kwa ge a goeletša mola tlalelo e mo tlela?
10A a ka thabela Yomaatlakamoka? A a ka bitša Modimo ka mehla?
11Tša seatla sa Modimo nna nka le ruta; nka se ke ka uta tša Yomaatlaohle.
12Hleng le lena bohle le di bone! Bjale le reng le šilofala wa mašilo?
13Kabelo ye yo mobe a tlogo e newa ke Modimo še. Ke bjona bohwa bjo bašoro ba tlogo bo fiwa ke Yomaatlaohle.
14Ge bana ba bona ba ata, ba atela lerumo; ditlogolo tša bona ga di ke di khora bogobe.
15Mašalela a bona a fihla ka dinkhu; mme ga a llelwe ke bahlologadi.
16Le ge ba kgobela mahumo boka mabu, le ge dikobo di ka ba atela bjalo ka maudi,
17di tlo ata, tša tlo aparwa ke moloki, mme mahumo a tlo abelwa wa sethakga.
18O ikagetše ngwako boka tshwele, o etša mokutwana wa modiši.
19O ya go robala a humile, mme a se boeletše; o phafoga mme a hwetša a se sa na selo.
20Tše di tšhošago di mo wetše bjalo ka mafula; o thopilwe ke ledimo la bošego.
21Phefo ya bohlabatšatši e mo kuka a tloga e mo ubutše mo a bego a agile.
22Mohla a tlogo betšwa ke Modimo a sa setšwe, o tlo tšhaba seatla sa gagwe a se hlwe a ema.
23Batho ba tlo šala ba opa magoswi, ba mo leletša molodi mo a bego a agile.
Who We AreWhat We EelieveWhat We Do
2025 by iamachristian.org,Inc All rights reserved.
