JESAYA 25 - Northern Sotho 1951/1986（NSO51）

Sereto sa monyanya wa baphološwa

1Morena, o Modimo wa ka! Ke a go godiša. Ke reta leina la gago, gobane o dira mehlolo; tše o di rerilego kgale ke therešo, di tiile.

2Gobane motse wo o o dirile lešope, meago ya dibo o e dirile marako; mešate ya bantle ga e sa le metse, e ka se hlwe e agwa neng le neng.

3Ke tšona tše batho ba maatla ba go retago ka tšona; metse ya tšhaba tše maatla e go boifa ka baka leo.

4Gobane o tšhabelo sa babotla, o tšhabelo sa badiidi ge ba hlaka, o bokhuto ditimong, o moriti ge go fiša, ge sehlogo sa bagale se ka pula ya lekfoka e khutile ka morako.

5Mašata a bantle maetšaphišo lešokeng, o a kokobeditše. Phišo ya fela ka thiti ya leru; dikati tša ba sehlogo di kokobetše.

6Morena wa mašaba o direla ditšhaba ka moka monyanya thabeng ye, monyanya wa makhura, wa dinwewa tše monate, wa dinwewa tše di hlotlilwego.

7Gomme thabeng ye Morena o tlo tloša šira le le širilego tšhaba tšohle, šela le le bipilego bantle bohle.

8Lehu o tlo le tloša ka go sa felego; Mong a bohle Morena o tlo phomola megokgo mahlong ohle; mme kgobogo ya setšhaba sagwe o tlo e široša dinageng ka moka; gobane Morena o realo.

9Mohla woo batho ba tlo re: Bonang, Modimo wa rena šo, yo re mmotilego mme a re phološa; ke yena Morena yo re mmotilego; a re hlalaleng re thabele phološo ya gagwe.

10Gobane tsogo la Morena le tlo dula thabeng ye. Ge e le Moaba, yena o tlo gatakelwa mo a lego gona, boka moko ge o gatakelwa moroleng.

11Mo a lego gona o etša seruthi se akga matsogo se rutha. Fela, o tlo kokobetšwa boikgogomošo le maano a diatla.

12Mme dibo tša gagwe tša merako e megolo o tlo di ušetša fase leroleng.