1Mehleng yeo gwa boela gwa ba le lešaba le lentši la batho, ba se ne sa go ja. Jesu a bitša barutiwa ba gagwe, ba tla go yena. A re:
2Mašaba a ke a kwela bohloko, gobane e šetše e le matšatši a mararo ba fela ba dutše le nna ba se ne sa go ja.
3Ge nka ba fa tsela ba ya magae ba sa na le tlala, ba tlo šarelwa tseleng; ka gobane ba bangwe ba bona ba tšwa kgole.
4Barutiwa ba fetola ba re: Dijo tša go khoriša lešaba le lekaakaa motho a ka di hwetša kae mono lešokeng?
5Yena a ba botšiša a re: Le na le dinkgwa tše kae?
Ba re: Ke tše di šupago.
6Jesu a laela a re lešaba le dule fase. A tšea dinkgwa tšeo tše šupago, a leboga, a ngwatha, a nea barutiwa ba gagwe a re ba abele batho; mme ba di abela lešaba.
7Le gona ba be ba na le dihlatswana di se kae; le tšona a di šegofatša, a re ba abelwe tšona.
8Ba ja ba khora, ba topa marathana a tlala diroto tše di šupago.
9Gomme ba ba llego e be e ka ba ba dikete tše nne; mme a ba lesa ba tloga.
10A tloga moo a namela leselawatle, ba tla nageng ya Dalamanutha.
11Gwa tla bafarisei ba fetolana le yena, ba re a ba direle mohlolo o tšwago legodimong, e le go mo leka.
12Yena a fegelwa moyeng wa gagwe a re: Moloko wo o nyakelang mohlolo? Ruri, ke a le botša, moloko wo o ka se ke wa newa mohlolo.
13A ba tlogela, a selela mošola ka leselawatle.
14Ba be ba lebetše go tloga le mefago, ba na le senkgwa se tee fela mo leselawatleng.
15Jesu a ba kgothatša a re: Le bone gore le phafogele komelo ya bafarisei le komelo ya Herode.
16Bona ge ba boledišana ba re: O ra ge re se ne mphago.
17Jesu, ka go tseba, a re: Le reng le eleletša mefago ye le sa kago la tloga nayo? A le bjalo ga lešo la hlalefa la hlaologanya? A le bjalo dipelo tša lena e sa le tše thata?
18A ga le bone mola le na le mahlo? A ga le kwe mola le na le ditsebe?
19Mola ba dikete tše tlhano ke ba ngwathetše dinkgwa tše tlhano, le tšere diroto tše kae tša marathana?
Bona ba re: Tše lesome la metšo e mebedi.
20Mola ba dikete tše nne ke ba ngwathetše dinkgwa tše di šupago, le tšere diroto tše kae tša marathana?
Bona ba re: Tše di šupago.
21Yena a re: Le reng le sa hlaologanye?
22Ba tsena Betsaida. Batho ba tliša sofofu go yena, ba mo kgopela ba re a mmee diatla.
23Yena a swara motho yoo wa sefofu ka seatla, a tšwa nae mo motseng, a mo tshwela mahlong, a mmea diatla, a mmotšiša a re: A o a bona?
24Motho yoo a gadia a re: Ke bona batho, eke ke dihlare ba dikologa.
25A buša a mmea diatla mahlong, a re a gadie. Motho yoo a folela ruri, a bona tšohle gabotse.
26Jesu a re a tloge a boele gae, a re: O se ke wa tsena fa motseng; le gona o se ke wa botša motho wa fa motseng.
27Jesu a tloga le barutiwa ba gagwe, a ya metsaneng ya Kesarea-Filipi. Ba le tseleng a botšiša barutiwa ba gagwe a re: Batho ge ba mpolela ba re ka mang?
28Barutiwa ba fetola ba re: Ba re o Johane Mokolobetši. Ba bangwe ba re o Eliya. Ba bangwe ba re o e mongwe wa baporofeta.
29Jesu a re: Gomme lena le re ke mang?
Gwa fetola Petro a re: O Kriste.
30Jesu a ba laela thata a re ba se ke ba mmolela le go motho o tee.
31Ke mo a thomilego go ba ruta tša Morwamotho, ge a swanetše go tlaišwa ka tše ntši, le go lahlwa ke ba bagolo, le ba mangwalo, le go bolawa, le go tsoga ge go fetile matšatši a mararo.
32Ditaba tše a di bolela ka mafolofolo. Petro a mmiletša thopeng, a thoma go mo sola.
33Jesu a retologa a lebelela barutiwa ba gagwe, a sola Petro a re: Tloga fa pele gaka, wena lenaba; gobane ga o eleletše tša Modimo; o eleletša tša batho.
34Bjale Jesu a phutha lešaba le barutiwa ba gagwe, a bolela le bona a re: Ge motho a rata go ntšhala morago a ikgafe a rwale sefapano sa gagwe mme a ntatele.
35Gobane e a ratago go phološa bophelo bja gagwe, o tlo bo lahla, mme e a lahlago bophelo bja gagwe ka baka la ka le ka baka la Ebangedi, o tlo bo phološa.
36Gobane motho go tlo mo holang ge a ka rua lefase ka moka, mme a senyegelwa le moya wa gagwe?
37Goba motho a ka ntšhang sa go rekolola moya wa gagwe?
38E a nago le maseme ka baka la ka le ka baka la dipolelo tša ka a le gare ga moloko wo wa bahlanogi le badiradibe, yena yoo le Morwamotho o tlo ba le maseme ka baka la gagwe mohla a tlago ka letago la Tatagwe a na le barongwa ba bakgethwa.
Who We AreWhat We EelieveWhat We Do
2025 by iamachristian.org,Inc All rights reserved.
