DIPSALME 46 - Northern Sotho 1951/1986（NSO51）

Modimo yo re mmotileng ke sebo se sethataYa Mohlabeledi, ya barwa ba Kora, ka moopelo wa basetsana.

1Modimo ke sebo sa rena le maatla a rena; ke Mohlakodiši, re mo lemogile dikotsing tše dintši.

2Re sa tlo boifang, le ge lefase le phekgoga, le ge dithaba di tekema di wela mawatleng,

3le ge mafula a ona a duma a gaša, le ge sehlogo sa ona se šišinya thaba.

4Noka še; meela ya yona e thabiša motse wa Modimo, sekgethwa sa Ngwako wa Morena.

5Morena o gare ga wona; o ka se ke wa šutha; Modimo o o phalalela e sa le ka meso.

6Ditšhaba di a ferekana, mebušo e a šutha; o kwatša lentšu la gagwe; lefase le a tšhoga.

7Morena wa mašaba o na le rena! Modimo wa Jakobo ke lentswesebo la rena.

8Tlang, le bone! Še mediro ya Morena, Mohlolatšhogo faseng,

9Mofedišadintwa go fihla mafelong a lefase, Morobakamara, Mothokgamarumo, Motšhumadikotsekamollo!

10Lesetšang! Le tsebe ge Modimo e le nna, Kokamaditšhaba, Kokamalefase.

11Morena wa mašaba o na le rena! Modimo wa Jakobo ke lentswesebo la rena.