1Go be go na le monna wa ga Benyamini; leina la gagwe e be e le Kisi, morwa wa Tseroro, morwa wa Bekorathe, morwa wa Aphia, wa ga Benyamini, monna wa lehumagadi.
2O be a na le morwa wa gagwe. Leina la gagwe e be e le Saulo, lesogana la senatla, le go bego go se Moisiraele e a le phalago ka botse. Gomme o be a feta batho ka moka ka leemo, batho ba bangwe ba mo goma ka magatleng.
3Kisi, tatago Saulo, o kile a timelelwa ke dipokolo; a botša Saulo morwa wa gagwe a re: Tšea e mongwe wa masogana, le tsoge le yo nyaka dipokolo.
4Saulo a ya a putlaputla le dithaba tša Efuraimi, le naga ya Salisa, a di hloka. A putlaputla naga ya Salima, mme di be di se ntshe. Ba putlaputla le naga ya ga Benyamini, ba se ke ba di hwetša.
5Ge ba fihla nageng ya Tsufi, Saulo a bolela le lesogana la gagwe a re: Tlaa, re gome; e se re mohlomong tate a gomela dipokolo a boifela rena.
6Lesogana la fetola la re: O ko bone hle! Ka fa motseng go na le monna wa Modimo. Ke monna e a tsebjago; tšohle tše a di bolelago di a tšwelela. A nke re ye go yena. Mohlomongwe o tlo re laetša tsela ra sepela ka yona.
7Saulo a fetola a re: Ge re ka ya go monna yo, re tlo mo neang? Etšwe mefago ya rena mo mokotleng e fedile. Re hloka sebego sa go nea monna eo wa Modimo. Re swereng?
8Lesogana la buša la re: Šedi, nna ke swere sa bone sa sekele; re tlo mo nea sona, a re laetša tsela.
9Kgaleng go Isiraele ge ba re re yo botšiša Modimo, ba be ba re: E re yeng go Mmoni! Ka gobane yo lehono e lego moporofeta, kgaleng ba be ba re ke Mmoni.
10Saulo a rera lesogana la gagwe a re: O boletše gabotse; e re yeng. Ke moka ba ya motseng wo monna wa Modimo a bego a le ntshe.
11Ba re ba sa botoga ba bona basetsana ba ba yago nokeng, ba ba botšiša ba re: A Mmoni o gona mo?
12Ba fetola ba re: Sola kua pele mo le yago. Fela, le akgofeng, ka gobane lehono o tlile fa motseng ka ge setšhaba se iša sedimo kua serokamelong.
13Ge le tsena motseng, le tlo mo hwetša a sešo a rotogela dijong kua serokamelong. Ka gobane batho ba ka se ke ba ja a sešo a tla. Malalediwa a tlo ja, ge a šegofaditše sehlabelo. Napang le rotoge. Lehono le tlo mo hwetša.
14Ba gorogela motseng. Ge ba fihla ya ba go gahlana le Samuele ge a etšwa a leba kua serokamelong.
15Ka la ka maabane, Saulo a sešo a tla, Morena o be a šetše a sebetše Samuele a re:
16Bosasa pakeno ke tlo roma monna a tla go wena a etšwa ga Benyamini. Yena eo o mo tlotše e be ketapele ya setšhaba sa ka sa Isiraele. Ke yena a tlogo namolela setšhaba sa ka diatleng tša Bafilisita. Ka gobane setšhaba sa ka ke a se bona, ka ge sello sa sona se mphihletše.
17Bjale ge Samuele a lebana le Saulo, a kwa Morena a mmotša a re: So; ke yena monna yo ke mmoletšego, ka re a buše setšhaba sa ka.
18Gomme Saulo ge a hlakana le Samuele kgorong, a re: A ko ntaetše ngwako wa Mmoni.
19Samuele a fetola a re: Mmoni ke nna! Nkete pele o rotogele kua mmotong; ka gobane lehono le tlo ja le nna. Re tlo laelana ka moswana, ka go botša tšohle tše di lego pelong ya gago.
20Ge e le dipokolo tše o timeletšwego ke tšona, tše lehono e lego matšatši a mararo di timetše, o se ke wa di belaela; di bonwe. -- Bjale bothakga ka moka bja Isiraele e tlo ba bja mang? A e ka se ke ya ba bja gago le bja leloko ka moka la tatago?
21Saulo a fetola a re: Hleng ke wa ga Benyamini, wa leloko lona le lenyenyane la Isiraele? Gomme mo dileteng tša ga Benyamini, se senyenyane ke sešo. Bjale o mpoletšang taba tšeo?
22Samuele a tloga a na le Saulo le lesogana la gagwe, a ba iša ngwakong wa go ja, a ba dudiša madulong a ka pele go ba ba bego ba laleditšwe, ba e nyakilego go ba banna ba masome a mararo.
23Samuele a botša moapei a re: Tliša nama yela ye ke go neilego yona, ka go botša ka re o e boloke.
24Moapei a tliša letsogo le le nago le leumo, a le bea pele ga Saulo. Samuele a re: Šeo nama ye re bego re go boloketše yona; tšea o je. E šadišitšwe gore e be ya gago mola ke re: Ke laleditše baeng.
Gomme Saulo a ja le Samuele mohla woo.
25Ge ba fologa mmotong ba tla motseng. Gomme Samuele a bolela le Saulo ba le ngwakong wa ka godimo.
26Ba tsoga e sa le bošego.
Ya re ge mahuba a hlatloga, Samuele a bitša Saulo e a bego a le ngwakong wa ka godimo, a re: Tsoga ke go fe tsela. Saulo a tsoga a tšwela ntle a na le Samuele.
27Ge ba fologa ba etla magomong a motse, Samuele a botša Saulo a re: Lesa lesogana le tloge le re ete pele. Lesogana la tloga. A re: Wena ema fa ke go botše lentšu la Modimo.
Who We AreWhat We EelieveWhat We Do
2025 by iamachristian.org,Inc All rights reserved.
