DIPSALME 63 - Northern Sotho 1951/1986（NSO51）

Go hlologelwa ModimoSefela sa Dafida sa mola a le lešokeng la Juda.

1Modimo, Modimo wa ka ke wena, ke go hlologetšwe. Pelo ya ka e nyoretšwe wena; mmele wa ka o llela wena ke le lešokeng, leganateng, mo go sego meetse.

2Ke le bjalo ka lebelela wena Sekgethweng, ke re ke bone maatla a gago le letago la gago.

3Gobane botho bja gago bo phala bophelo ka botse; molomo wa ka o a go reta.

4Ke tlo realo ke go godiša ge ke sa phela; diatla tša ka di lotšha leina la gago.

5Moya wa ka e ke o khora moko le makhura; ganong ga ka go tšwa theto ya melomo ya mekgolokwane.

6Ge ke yo lala, ke gopola wena; ge ke phafoga, ke elelwa wena.

7Gobane o tloga o le mophološi wa ka; ke hlalala ke le moriting wa diphego tša gago.

8Moya wa ka o go gomaretše, o go šetše nthago; ke thekgwa ke letsogo la gago le maatla.

9Fela bala ba go tsoma moya wa ka gore ba o senye, bona ba tlo kodumela kua fasefase.

10Ba tlo lahlwa ba lewa ke lerumo, ya ba dijo tša diphukubje.

11Kgoši yona e tlo ithabela Modimong; go tlo retwa bohle ba ba enago ka yena, gobane melomo e batago maaka e tlo thibja.