1Josafate ge a atetšwe ke mahumo le go retwa, a tšeelana le Ahaba.
2Ya re go fetile nywaganyana, a etela Ahaba motseng wa Samaria. Ahaba a hlabela Josafate le batho ba tlilego le yena dinku le dikgomo tše ntši, a mo otelela gore a tšwele Ramothe motse wa Gileada dira.
3Ahaba kgoši ya Isiraele a bolela le Josafate kgoši ya Juda a re: A o ka se ye le nna kua Ramothe nageng ya Gileada?
Josafate a re: Nna le wena re batee, le setšhaba sa ka ke setšhaba sa gago; re tla ema le wena tlhabanong.
4Josafate a bolela le kgoši ya Isiraele a re: A nke o botšiše se Morena a se bolelago lehono.
5Kgoši ya Isiraele a bitša baporofeta, banna ba makgolo a mane, a ba botšiša a re: A fa re ka yo hlabana le motse wa Ramothe wa Gileada? Goba re lese go ya?
Bona ba re: Sepela, gobane motse woo Morena o tlo o gafela seatleng sa gago, Kgoši!
6Josafate a re: A ga go sa na le moporofeta wa Morena fa, yo re kago mmotšiša?
7Kgoši ya Isiraele ya re: Go sa le monna e mongwe, yo re kago botšiša Morena ka yena; fela, nna ke mo hloile, ka gobane ga a mporofetele tše botse, ge e se tše mpe ka mehla. Ke Mika morwa wa Jimila.
Josafate a re: A kgoši e se realo.
8Kgoši ya Isiraele a bitša e mongwe wa balaki, a re: Akgofa o bitše Mika morwa wa Jimila.
9Kgoši ya Isiraele le Josafate kgoši ya Juda ba dula didulong tša bona lepatlelong le le išago kgorong ya Samaria ba tšhephile ka tša bogoši; gomme baporofeta ka moka ba be ba fela baporofeta pele ga bona.
10Tsedekia morwa wa Kenana o be a itiretše dinaka tša tshipi, a re: Morena o re: Ka naka tše o tlo hlaba Basiria wa ba fediša.
11Baporofeta ka moka ba porofeta tše bjalo, ba re: Rotogela Ramothe wa kua Gileada; o tlo atlega; motse woo Morena o tlo o gafela diatleng tša gago, Kgoši!
12Motseta yola wa go bitša Mika a bolela le Mika a re: O tsebe gore melomo ya baporofeta e eme ka lentšu letee le le kgahlišago kgoši; a nke le la gago lentšu le etše a bona, o bolele tše botse.
13Mika a re: Ka bophelo bja Morena, ke tlo bolela se Morena a mpotšago sona.
14Ge a etla kgošing, kgoši ya mo rera ya re: Mika, a re ka ya ntweng kua Ramothe nageng ya Gileada, a goba re lese go ya?
Mika a re: Sepela, o tlo atlega; gobane ba tlo gafelwa diatleng tša lena.
15Kgoši ya mo rera ya re: A ke tlo fela ka go eniša gore o se mpotše a mangwe ge e se therešo leineng la Morena?
16Ke mo Mika a boletšego a re: Nna ke bona Isiraele ka moka ba tšitlane le dithaba, ba etša dinku tše di hlokago modiši. Morena o re: Ga di na mong wa tšona. A batho ba boele magaeng a bona, e be leago.
17Kgoši ya Isiraele ya bolela le Josafate ya re: A ga nka ka go botša ka re: A ka se ke a mporofetela tše botse, ge e se tše mpe?
18Mika a re: Gona kwang se Morena a se bolelago. Nna ke bone Morena a dutše sedulong sa gagwe sa bogoši; mašaba ka moka a legodimo a mo eme ka go le letona le go la ntsogošo.
19Morena a re: Ke mang a kago ya a foraforetša Ahaba gore a tšwe a yo bolawa kua Ramothe wa Gileada? E mongwe a bolela ka go re, e mongwe a bolela ka go re.
20Gwa tšwelela e mongwe wa meoya wa ema pele ga Morena wa re: Nna ke tlo mo foraforetša! Morena a re: Ka mokgwa ofe?
21Wa re: Ke tlo tšwa ka itira moya wa maaka melomong ya baporofeta ba gagwe ka moka. Morena a re: O tlo kgona; sepela o yo dira ka mokgwa woo.
22Bjale o tsebe gore Morena o beile moya wa maaka melomong ya baporofeta ba ba gago; Morena o go reretše kotsi.
23Ke mo Tsedekia morwa wa Kenana a batametšego a phasola Mika thama, a re: Moya wa Morena o tlo ba o ntlogile ka tsela efe, mme wa bolela ka wena?
24Mika a re: Ge e le wena o tlo di lemoga mohla o tlo go tšhaba o putlaputla le diphapoši o utama.
25Kgoši ya Isiraele ya re: Tlogang le Mika le mo iše go Amoni molakamotse, le go Joase morwa wa kgoši.
26Le fihle le re: Kgoši e re: Motho e le mo išeng kgolegong; le mo lešeng bogobe bja mahloko; le mo nošeng meetse a mahloko, go fihla ge ke tlo boa ntweng e le šebešebe.
27Mika a re: Ge o ka boa e le šebešebe, gona Morena o tlo ba a sa bolela ka nna! A fetša ka go re: Setšhaba ka moka, theetšang!
28Ke moka kgoši ya Isiraele le Josafate kgoši ya Juda ba rotogela Ramothe wa Gileada.
29Kgoši ya Isiraele ya bolela le Josafate ya re: Ge re tsena ntweng, nna ke tlo itira o šele; ge e le wena o apare diaparo tša gago. Kgoši ya Isiraele ya ikgakantšha, ya napa ya gahlana.
30Ge e le kgoši ya Siria yona e be e laetše balaodi ba dikoloi ya re: Lesang go hlabana le yo e ka bago e monyenyane le ge e le e mogolo, ge e se kgoši ya Isiraele e nnoši.
31Bjale balaodi ba dikoloi ge ba bona Josafate, ba re ke yena kgoši ya Isiraele; ba tepogela go yena ba mo dika. Josafate a hlaba mokgoši, Morena a mo namolela, Modimo a ba gomiša ba mo lesa.
32Balaodi ba dikoloi ba be ba bone ge e se yena kgoši ya Isiraele, mme ba mo gomela.
33Gomme monna e mongwe e a bego a sa tsebe, a swara bora bja gagwe a betša, mosebe wa hlaba kgoši ya Isiraele, wa tsena ka mo magahlanong a sephemo sa sehuba le sa dinoka. Ahaba a botša mosepediši wa koloi ya gagwe a re: Retologa, o nntšhe thlabanong; nna ke kutlegile.
34Fela, tlhabano ya mohla woo ya thatafala; kgoši ya Isiraele ya hlwa e eme koloing e lebane le Basiria, la ba la rapama, ya hwa ge le dikela.
Who We AreWhat We EelieveWhat We Do
2025 by iamachristian.org,Inc All rights reserved.
