1Modiidi molokaletsela o phala motho wa ditshele wa setlatla.
2Ge o sa itlhaloganye, go go botse; go tlanakela ke go senya.
3Motho o senyetšwa tsela ke bošilo bjagwe, a nape a tsota Morena.
4Lehumo le rapa bagwera; mmotlana, le ba gabo ba a mo lahla.
5Hlatse ya maaka ga e efoge kotlo; mmatamasese a ka se phonyokge.
6Ba bantši ba šika le bagolo; e a sa timego ba gwerana nae bohle.
7Modiidi, bana babo bohle ba a mmeka; le bagwera bagwe ba a mo šunya; ge a tlela tše ba mmoditšego tšona, o hwetša ba se gona.
8Mohumatšapelong o itsheditše; molotolatlhaloganyo o tlo bona tše di botse.
9Hlatse ya maaka ga e efoge kotlo; mmatamasese o tlo senyega.
10Mašoto a rona setlatla; gagolo go ka rona ge molata a buša marena.
11Molemogi ga a na sebefedi; bokwala bja gagwe ke ge a sa latiše phošo.
12Sekgoro sa kgoši se etša go bopa ga tau; botho bja yona bo etša monola.
13Ngwana yo setlatla ke masetlapelo a tatagwe; manganga a mosadi ke matlobotlobo a sa kgaotšego.
14Motse le thoto ke bohwa botšwagotatagomotho; mosadi wa tlhalefo o tšwa go Morena.
15Bobodu bo robatša boroko bjo bogolo; pelo e tšwafago e tlo hwa ka tlala.
16Mokwataelo o a itota; monyatšatselatšagwe o tlo hwa.
17Tlhallabadiidi o adima Morena; mme Yena o tlo mmušetša tše a di neilego bala.
18Sola ngwanago go sa holofetša; o se tlo ba wa mo galefela wa mmolaya.
19Wa sebefedi o tlo otlwa; ge o ka namola, e ba go hlohloletša.
20Kwaa keletšo, o eletšege; o hlalefele tša ka moso.
21Pelo ya motho e loga maano a mantši; go phethega se Morena a se beilego.
22Motho o nkgahla ka botho; ke mo le mmotlana a tlo go phala monna wa go fora.
23Go šia Morena go iša bophelong, motho a ja a lala a sa tlelwe ke bošula.
24Sebodu se iša seatla mogopong, se se sa se iša molomong.
25Wa lonya mo otle, setlatla se hlalefe; moeletšegi ge a solwa ke mo a tlo go tseba.
26Ngwana molešahlong wa tšhegamiša, o goboša rragwe, o leleka mmagwe.
27Ngwanaka! Lesa go theetša thuto ya go aroga mafoko a tsebo.
28Hlatsesehlola e šunya molao; mogolo wa babe o metša bokgopo.
29Ba lonya ba beetšwe kotlo, kgati e beetšwe mekokotlo ya mašilo.
Who We AreWhat We EelieveWhat We Do
2025 by iamachristian.org,Inc All rights reserved.
