JEREMIA 47 - Northern Sotho 1951/1986（NSO51）

Kotlo ya Filisita le Tiro le Sidone

1Šele lentšu le le tletšego Jeremia moporofeta, e le la Morena le ela Bafilisita; ke la mola Farao a sešo a hula motse wa Gatsa.

2Morena o re: Meetse šeao! A tla a etšwa leboa; e tlo ba noka e gogolago, ya go tlo gogola naga, le tšohle tše di lego mo go yona, le metse, le ba agilego mo go yona. Batho ba tlo goa; baagi ba naga ba tlo golola,

3Ge go tlo kwala mašata a mešito ya dipitsi tšagwe, le go kitisela ga koloi tšagwe, ge go duma maotwana a tšona, ke mo botatagobana ba se sa tlogo gadima bana ba bona, ka ge matsogo a rephile.

4Ka gobane go tlo ba go tlile tšatši la go šwalalanya bohle Bafilisita, la go fedišetša Tiro le Sidone bathekgetši ba šetšego. Gobane Morena o tlo šwalalanya Bafilisita, mašalela a hlakehlake sa Kafutori.

5Gatsa go kutilwe hlogo; Asikalone go fedišitšwe; se se šaletšego ke mangope. O tlo fela o iphatša wa ba wa feletša kae?

6Joo, lerumo la Morena! O tlo ba wa khutša neng? Boela segatleng, o khutše, o homole!

7Fela, le ka khutša bjang le romilwe ke Morena go yo hula Asikalone, le leboto la lewatle, a le lebišitše gona?