DIPSALME 4 - Northern Sotho 1951/1986（NSO51）

Kholofelo ya mogaugelwaSefela sa Dafida, sa mohlabeledi, ka Makope.

1Mohla ke bitša o nkarabe, Modimo wa go loka ga ka. Mohla ke le tlalelong o ntšweleditše molaleng. Nkgaugele hle, o kwe topo ya ka.

2Hee lena Bana ba batho! Le tlo kgaotša neng go ntshenya leina, le go rata lefela, le go latela maaka?

3Tsebang gobane Morena o ikgethetše moleta; Morena o a nkwa ge ke mmitša.

4Thothomelang, le lese go senya. Bolelang le pelo tša lena le le dilaong, le homole,

5Le tliše didimo tša toko, le bote Morena.

6Ba bantši ba re: Tše botse re tlo di bona ka mang? Re hlabišetše seetša sa mahlo a gago, Morena.

7Nna o nnea lethabo pelong; le feta la mola ba atetšwe ke mabele le morara.

8Ke wa pelo, mme ke lala ka robala; gobane e a nkagišago ka iketla ke le nnoši, ke wene Morena.