DIEMA 20 - Northern Sotho 1951/1986（NSO51）

Diema tša Salomo

1Bjalwa bo na le lonya; sebela se ne mašata; bohle ba ba gokwago ke tšona ga ba hlalefe.

2Kgalemo ya kgoši ke tau ge e bopa; e a e rumolago o a ipolaya.

3Se se godišago monna ke go efoga kgang; mašilo ohle a na le mereba.

4Sebodu, mohla wa phefo ga se leme; punong se yo diila se se bone selo.

5Maano pelong ya monna ke meetse a bodiba; a giwa ke yo tlhaloganyo.

6Batho ba bantši ba thwe ke ba botho; mme monnammotegi o hwetšwa ke mang?

7Moloki wa tsela e bolo, bana ba gagwe ba šala e le ba mahlatse.

8Kgoši ge e dutše dulo sa kahlolo, bobe bjohle e raka ka mahlo.

9Ke mang e a kago re: Ke hlatswitše pelo yaka, ke tšwile dibe tšaka?

10Kelo ya go se lekane boima le bolele, Morena o a e nyenya.

11Le mošemanyana o lemogwa ka mediro yagwe, ge e le yo botse le yo bolo.

12Tsebe e kwago le ihlo le bonago; ka dipedi di dirilwe ke Morena.

13Se rate boroko, o se tlo diila; phafoga, o tle o je bogobe.

14Moreki e sa le “Ke a lewa, ke a lewa!” A tloga, o tšama a itheta.

15Talama le dipheta ke tše ntši: matsaka a paala ke melomo e bohlale.

16Mo amoge kobo, o humetše mosetsebje; mo swarelele ka baka la o šele.

17Motho o tsefetšwe ke selewa sa bohodu, molomo wa šala o tletše lehlwahlwa.

18Maano a thekgwa ka keletšo; dira le tšwe le lakane.

19Moakabele ke moekabatho; se kwane le bona baahlami bao.

20Morogatatagwe le mmagwe, bone lagwe le tlo tima a le kgamping ya lefsifsi.

21Bohwa bja maphakaphaka-mathomong, bo yo hloka tšhegofalo pheletšong.

22Se re: Bobe ke tlo lefetša! Letela Morena; o tlo go thuša.

23Modimo o nyenya moelelokgopo; kelo ya go fora ga se selo se se botse.

24Nao tša motho di bušwa ke Morena; motho yena mong ga a lemoge tsela yagwe.

25Maphakagore: Ka Modimo! O itheile; ge a enne, go šala pelaelo.

26Kgoši e bohlale e lotša setšhaba, mme ba babe ba bušetšwa seboeng.

27Moyamotho ke lebone la Morena; le bonegela thopa tšohle tša mmeleng.

28Baletakgoši ke lerato le therešo; sedulo sa yona se thekgwa ke lona lerato.

29Seala sa tshogana ke matla a bona; mofapahlogo wa bagolo ke hlogo e pududu.

30Dihlatswabobe ke megogoma le mabadi; dikgati di hlatswa dithopa tša mmele.