1Gomme Morena a laela Moshe, ba le molaleng wa Moaba nokeng ya Jorodane go lebana le motse wa Jeriko, a re:
2Laela Baisiraele gore mo dinageng tša bona ba nee Balefi metse ye ba ka dulago go yona; Le nee Balefi mafulo tikologong ya metse yeo.
3E be metse ya bona, ye ba tlogo dula go yona; gomme mafulo e be a dikgomo tša bona, le a mehlape ya bona, le a diruiwa tša bona.
4Naga yeo ya mafulo a metse ye le tlogo e nea Balefi, go tloga merakong ya motse go iša mellwaneng, e be meelo e sekete setee, e dikologa le motse.
5Ge le e ela ka ntle ga motse, lehlakore la thoko ya bohlabela e be meelo e dikete tše pedi, la borwa e be meelo e dikete tše pedi, la bodikela e be meelo e dikete tše pedi, le la leboa e be meelo e dikete tše pedi; motse o be mo gare. E tlo ba yona ya mafulo mo metseng ya bona.
6Mo go metse ye le tlogo e nea Balefi go be le metse e selelago ya botšhabelo, ye mmolai a kago tšhabela go yona. Ka ntle ga yona le ba nee metse e masome a mane a metšo e mebedi.
7Metse ka moka ye le tlogo e nea Balefi e be e masome a mane a metšo e seswai, le mafulo a lego go yona.
8Mo go metse ye le tlogo ba nea yona bohweng bja Baisiraele le hlaole e mentši go ba ba nago e mentši, e se mekae go ba ba se nago e mentši. Moloko o mongwe le o mongwe o nee Balefi ka mo go lekanego naga ya wona.
9Morena a bolela le Moshe a re:
10Bolela le Baisiraele o ba botše o re: Ge le setše noka ya Jorodane la tsena nageng ya Kanana,
11le hlaole metse ye e tlogo ba metse ya botšhabelo, gore mmolai, e a bolailego motho a sa dira ka boomo, a tšhabele go wona.
12Metse yeo e tlo ba botšhabelo bja lena ge le tšhaba molefetšamadi, gore mmolai a se ke a bolawa a sešo a ema pele ga phuthego a sekišwa.
13Le hlaoleng metse e selelago e be metse ya lena ya botšhabelo.
14Mošono wa Jorodane le bee e meraro, le nageng ya Kanana le bee e meraro, e be metse ya botšhabelo.
15Metse e selelago yeo e tlo ba ya go tšhabela Baisiraele, le moeng, le e a diiletšego go lena, gore e a bolailego motho a sa dira ka boomo a thšabele gona.
16Fela, ge a tiile motho ka selo sa tshipi, motho a hwa, gona ke mmolai; gomme sa mmolai ke go bolawa.
17Le ge a tšere leswika le le kago bolaya motho, a mo kgitla ka lona, a hwa, gona ke mmolai; gomme sa mmolai ke go bolawa.
18Ge a mo tiile ka phata e kago bolaya motho, motho a hwa, gona ke mmolai; gomme sa mmolai ke go bolawa.
19Mmolai a bolawe ke molefetšamadi; a mmolaye mo a mo hwetšago.
20Le ge motho a mo hloile, goba a mmetša ka selo ka boomo, motho a hwa,
21goba a ka mo tia ka letsogo, motho a hwa, motii ke mmolai, sa gagwe ke go bolawa. Molefetšamadi a bolaye mmolai eo mo a mo hwetšago.
22Fela, ge motho a ka tšhoga a kutlile e mongwe e se ka bonaba, goba a re ke betša selo a mo tia e se ka boomo,
23goba a mo kgatla ka leswika le le kago bolaya motho, a dira a sa ka a mmona, motho a hwa, a sa ka a dira ka bonaba, a sa lebanya go mo kutla,
24gona phuthego e seke taba ya mmolai le molefetšamadi ka mokgwa wo:
25Phuthego e phološe mmolai diatleng tša molefetšamadi; phuthego e mo gomišetše motseng wa botšhabelo bja gagwe, mo a bego a tšhabetše gona. Gomme a dule ntshe go be go hwe moperisita e mogolo e a tloditšwego ka makhura a makgethwa.
26Fela, ge mmolai a ka tšwa a sela mollwane wa motse wa botšhabelo bja gagwe, mo a tšhabetšego ntshe,
27mme molefetšamadi a mo hwetša ka ntle ga mellwane ya motse wa botšhabelo bja gagwe, ge a ka mmolaya, a ka se ke a ba le molato wa madi.
28Ka gobane o be a swanetše go dula motseng wa botšhabelo bja gagwe go fihla lehung la moperisita e mogolo. Ge moperisita e mogolo a hwile, ke mo mmolai a kgonago go boela gae nageng ya gagwe.
29Tšona tše e be molao wa lena wa go ahlolwa go iša ditlogolong, mo go fela mo le tlogo dula gona.
30Motho ge a bolaile motho, mmolai o tlo bolawa ka molomo wa dihlatse. Fela, hlatse e tee e ka se ke ya kgona go iša motho lehung.
31Le se ke la amogela selefa sa go hlekelela bophelo bja mmolai e a swanetšego go bolawa; sa gagwe a e be go bolawa.
32Le gona le se ke la amogela selefa sa go lefela motho e a tšhabetšego motseng wa setšhabelo sa gagwe, la dira gore a boele gae a dule, mola moperisita e mogolo a sešo a hwa.
33Le se ke la goboša naga ye le agilego go yona; ka gobane madi a goboša naga; gomme naga ge e tšhologetšwe madi, ga e na seboelanyi, ge e se madi a eo a a tšholotšego.
34Lesang, gee, go tšhilafatša naga ye le dutšego go yona, ye nna ke agilego go yona; ka gobane nna Morena ke agile le Baisiraele.
Who We AreWhat We EelieveWhat We Do
2025 by iamachristian.org,Inc All rights reserved.
