1Gomme Dafida a bala setšhaba se se bego se na nae, a bea balaodi ba dikgao tša dikete le tša makgolo.
2A ba ntšha diphohla tše tharo; sa pele sa laolwa ke Joaba; sa bobedi sa laolwa ke Abisai morwa wa Tseruya monnago Joaba; sa boraro sa laolwa ke Ithai monna wa ga Gathe. Kgoši ya bolela le setšhaba ya re: Le nna ke tlo tšwa le lena.
3Batho ba re: Wena o se ke wa tšwa. Ge rena re ka tšhaba, ba ka se ke ba re šetša; le ge ba ba bolawago ba ka lekana le ba ba phologago, ba ka se ke ba re šetša; fela, wena o lekana le ba dikete tše lesome ba rena. Go kaone ge o re thekgile o le fa motseng.
4Kgoši ya fetola ya re: Ke tlo dira se le se ratago. Gomme kgoši ya ema kgorong; setšhaba sa tšwa ka ba makgolo le ba dikete.
5Kgoši ya laela Joaba le Abisai le Ithai, ya re: Le ntsebafele lesogana leo Abesalomo. Setšhaba ka moka sa kwa ge kgoši e laela balaodi ka baka la Abesalomo.
6Setšhaba sa tšwa, sa tla lešokeng, sa gahlana le Baisiraele; ntwa ya lowa sekgweng sa Efuraimi.
7Gona moo bahlanka ba Dafida ba fenya setšhaba sa Isiraele; polao ya ba e kgolo, gwa bolawa banna ba dikete tše masome a mabedi mohla woo.
8Tlhabano ya aparela naga ka moka; gomme sekgwa sa ja batho ba ba fetago bao ba ba bolailwego ka marumo mohla woo.
9Abesalomo a tšwelela a bonwa ke bahlanka ba Dafida; o be a nametše meila. Yona yeo ya huhumela ka tlase ga makala a raranego a morula o mogolo, a tanywa hlogo a lepelela a sa fihlele godimo mme le fase a sa fihle; meila ya tšhaba ka tlase ga gagwe.
10Monna e mongwe a mmona, a botša Joaba a re: Abesalomo šole; ke mmone a lepeletše moruleng.
11Joaba a fetola a re: O mmone, mme o reng o sa ka wa mo kgabutla gona moo a wela fase? Nna nka be ke go nea diripana tše lesome la silifera le moketwana.
12Monna eo a re: Le ge o ka be o mpalela diripana tše sekete sa silifera wa nnea, morwa wa kgoši nka se be ka mo iša seatla, gobane kgoši o laetše wena le Abisai le Ithai, rena ka moka ra di kwa ge a re: Le bone gore lesogana leo Abesalomo a se ke a hlokofatšwa.
13Bjale ge nka be ke mmolaile sepogo, gomme ka ge go se ne taba e kago utagala go kgoši, le wena ka noši o ka be o ntahla.
14Joaba a re: Nka se hlwe ke diega nago. A tšea marumo a mararo, a ya a hlaba Abesalomo ka pelong a sa phela a le moo moruleng.
15Gomme masogana a lesome a go mo rwalela marumo, ba teta Abesalomo ba mmolaya a hwa.
16Ya ba gona Joaba a letšago phalafala; setšhaba sa gomela Baisiraele sa boa, ka gobane Joaba a se thibela.
17Ba tla ba tšea Abesalomo, ba mo lahlela moleteng o mogolo wa moo sekgweng, ba mo kgatlela mokgobo o mogolo wa maswika. Baisiraele bona ba be ba tšhabile, e mongwe le e mongwe a boela ga gabo.
18Abesalomo, mola a sa phela, o be a itsemetše leswika la thololo moeding wa dikgoši, gobane a re: Ga ke na morwa yo leina la ka le kago šala le gopolwa ke yena. Thololo yeo o e reetše leina la gagwe; le lehono ba sa re ke seka sa Abesalomo.
19Ahimaatse morwa wa Tsadoko a re: A nke ke kganyele ke yo begela kgoši, ke re: Morena o go ahloletše a lahla manaba a gago.
20Joaba a re: Lehono moišantšu ga se wena; o tla le iša ka mohla o mongwe. Lehono go se ke gwa ya wena, ka gobane go bolailwe morwa wa kgoši.
21Joaba a bitša Kuši a re: Yaa wena o anegele kgoši tše o di bonego.
Kuši a lotšha Joaba, a tloga a tšea ka lebelo.
22Ahimaatse morwa wa Tsadoko a šala a bolela le Joaba a re: Le ge go le bjalo, lesa le nna ke kganyele ke latele Kuši.
Joaba a re: Ngwanaka! O sa kganyelang? Hleng go se se o tlogo lebogwa ka sona?
23Ahimaatse a re: Le ge go le bjalo, lesa ke kganyele!
Joaba a ba a re: Sepela ge!
Ke moka Ahimaatse a kganyela, a kgaola ka tsela ya molala, a šia Kuši.
24Dafida o be a dutše mo gare ga kgoro ya pele le kgoro ya bobedi. Mohlapetši o be a rotogetše seokamelong sa mo morakong. Ya re ge a gadia, a bona motho a etla a kganyela a nnoši.
25A hlaboša lentšu a tsebiša kgoši. Kgoši ya re: Ge a le nnoši, o tliša taba. Monna yola a fela a sepela a etla.
26Mohlapetši a bona monna e mongwe e etla a kganyela. A hlaboša lentšu a botša moletakgoro a re: Monna šole, o kganyela a le nnoši!
Kgoši ya re: Le yena ke motlišataba!
27Mohlapetši a re: Ke a bona, mosepelo wa wa pele e ka ba wa Ahimaatse morwa wa Tsadoko.
Kgoši ya re: Yena ke monna wa paala, o tliša taba e botse.
28Ke ge Ahimaatse a hlaboša lentšu a re: Khutšo! A tla a lotšha a inametše fase pele ga kgoši, a re: A go lebogwe Morena Modimo wa gago, ka gobane banna bale ba go go tsogela o ba gafetše diatleng tša gago, Kgoši Mongaka!
29Kgoši ya re: Lesogana lela Abesalomo a o sa thabile?
Ahimaatse a re: Nna ke filo bona moferefere o mogolo, ge Joaba a roma mohlanka wa kgoši le nna mohlanka wa gago; fela ga ke tsebe tše di diregilego.
30Kgoši ya re: Šutha o eme moo! A šutha a ema moo.
31Ke ge go fihla Kuši; yena a re: Kgoši Mongaka, taba e botse še: Lehono Morena o go ahloletše ka go loka, a lahla ba ba bego ba go tsogetše maatla.
32Kgoši ya re: Lesogana lela Abesalomo a o sa thabile?
Kuši a re: A manaba a kgoši mong wa ka a dirwe se se dirilwego lesogana leo, gotee le bohle ba ba tsogetšego go go dira bošula.
33Ke mo kgoši e tšhogilego ka kudu, ya rotogela ngwakong wa ka godimo ga kgoro, ya lla, ya tšama e re: Abesalomo ngwanake! Abesalomo ngwanake! A go ka be go hwile nna, bakeng sa gago! Joo Abesalomo ngwanake! Ngwanake joo!
Who We AreWhat We EelieveWhat We Do
2025 by iamachristian.org,Inc All rights reserved.
