DIPSALME 17 - Northern Sotho 1951/1986（NSO51）

Thapelo ya modikiwaThapelo ya Dafida.

1Morena, kwaa taba ya go loka. Theetša sello sa ka; thapelo ya ka o e sekegele tsebe, ke ya molomo o se nago maaka.

2A nke ke ahlolelwe ke wena; mahlo a gago a bone se e lego toko.

3Ge o ka lekola pelo ya ka, wa e hlola bošego, wa mphenyeka, o ka se hwetše seakanyo se ke sa kago ka se bua ka molomo.

4Le ge batho ba na le mekgwa ya bona, nna -- ka go kwa lentšu la gago -- ke ila ditsela tša ba bašoro.

5Dinao tša ka di ganeletše mehlaleng ya gago, maoto a ka a se thekesele.

6Modimo, ke bitša wena, gobane ke wena e o nkarabago. Ntshekegele tsebe o kwe se ke se bolelago.

7A nke o bonatše matete a dikgaugelo, wena Mophološi wa ba ba khutago seatleng sa gago mohla ba dikilwe.

8Ntote boka thaka yaleihlo. O mphihle moriting wa di phego tša gago.

9Ke efoge ba babe ba go nkwela godimo; ke manaba a hlonya pelong a a ntikilego.

10Ke ba di pelo tše di retešego, ba melomo ya go bua maikgantšho.

11Bjale ba re putla mo re yago; mahlo a bona a nyaka sebaka sa go re šwahlela.

12Ba swana le tau ge e duma nama, taulesogana, ge e patlametše go lalela.

13Morena, nanoga, o gahlane nabo; ba digele fase, o hlakodiše moya wa ka diatleng tša babe ka lerumo lago.

14Morena, diatleng tša batho bao o ntlhakodiše ka letsogo lago. Ke batho ba lefase, ba ba abetšwego tša bophelo bjono. O ba tlatša dimpa ka menono yago, bana ba bona ba ata, lefa ba le tlogelela ditlogolo.

15Ge e le nna, ke tlo boga sefahlogo sago ke le wa go loka. Ke tlo phafoga mme ka khora mahlo ka go bona se o lego sona.