SAKARIA 3 - Northern Sotho 1951/1986（NSO51）

Pono ya boperisita bjo bo tlogo tla ka lehlogedi

1A mpontšha Joshua moperisita e mogolo a eme pele ga Morongwa wa Morena, Sathane a mo eme ka letsogong le letona a mmega.

2Morena a bolela le Sathane a re: Morena o kgalema wena Sathane; o kgalengwa ke yena e a kgethilego motse wa Jerusalema. A monna e ga se legong le le ehutšwego mo mollong?

3Mme Joshua o be a apere diaparo tša ditšhila a eme pele ga Morongwa.

4Yena Morongwa yo a bolela le ba ba emego pele ga gagwe a re: Mo apoleng diaparo tšeo tša ditšhila! A bolela le Joshua a re: Tseba gore molato wa gago ke o tlošitše go wena; ke go apeša diaparo tša botšhepi.

5Bjale ke re: A ba mo rweše kefa ye e se nago ditšhila! Ke ge ba mo rweša kefa e se nago ditšhila, ba mo apeša diaparo, Morongwa wa Morena a eme moo.

6Morongwa wa Morena a bolela le Joshua a tiiša a re:

7Morena wa mašaba o re: Ge o swara ka tsela tša ka, wa lotola mekgwa ya ka, wa laka Ntlo ya ka, wa hlapetša malapa a ka, ke tlo go dumelela go batamela le bona ba ba ba ntlhankelago,

8Theetša gee, wena Joshua moperisita e mogolo, wena le bagwera ba gago ba ba nago le madulo pele ga gago; le banna ba seka; gobane le tsebe gore ke sa tlo tliša mohlanka wa ka yena Lehlogedi.

9Bjale bona; leswika le le beilwego pele ga Joshua, lona leswika leo le okametšwe ke mahlo a šupago (Sak. 4:10); mme o tsebe gore ke nna ke tlogo le tloka lengwalo. -- O realo Morena wa mašaba. -- Molato wa naga ye ke tlo o fediša ka letšatši le tee.

10Mohlang woo, -- o realo Morena wa mašaba, -- monna o tlo laletša wa gabo a re: Tlaa re dule moriting wa morara le wa mogo.