1 DIKGOŠI 19 - Northern Sotho 1951/1986（NSO51）

Eliya o tšhabela thabeng ya Horebe

1Gomme Ahaba a botša Isebele tšohle tše Eliya a di dirilego, le tšohle tša ge a bolaya baporofeta ba Baali ka tšhoša.

2Ke mo Isebele a nago a roma motseta, a tla go Eliya a re: Modimo a o ntire ka gore le ka gore ge ka moswana pakeno ke sa go dire se o se dirilego banna bala ka moka.

3Eliya ge a bona di eme ka mokgwa wo, a nanoga a tšhabiša bophelo bja gagwe, a tla Bereseba nageng ya Juda; lesogana la gagwe a le tlogela ntshe.

4Yena a tsena lešokeng a fetša leeto la letšatši letee, a dula moriting wa sehlare sa mošwana, a ikgopelela go hwa a re: Go hwetše bjalo; Morena tšea moya wa ka, ka gobane ga ke fete botate ka bothakga.

5A ithobalela a ya le boroko a le moriting wa mošwana. A tšhoga ge Morongwa a mo šišinya, a mo rera a re: Tsoga o je!

6A takataketša mahlo, a bona senkgwa se se bešitšwego, le segwana sa meetse, di beilwe dihlogong tša gagwe. A ja, a nwa, a boela a robala.

7Morongwa wa Morena a tla la bobedi, a mo šišinya a re: Tsoga o je, gobane leeto la gago ke le legolo; le ka go palela.

8Eliya a tsoga, a ja, a nwa, gomme ka maatla a dijo tšeo a sepela matšatši a masome a mane le bošego bja ona; a ba a fihla thabeng ya Horebe thabeng ya Modimo.

9Ntshe a fihla mphomeng a lala gona.

A kwa lentšu la Morena le mo tlela le re: Eliya, o nyakang fa?

10Yena a re: Ke be ke galefile ke lwela Morena Modimo wa mašaba, ka gobane Baisiraele ba lahlile kgwerano ya gago, ba phušotše dialetare tša gago, ba bolaile baporofeta ba gago ka lerumo; bjale go šetše nna ke nnoši; gomme ba nnyaka gore ba nkamoge bophelo.

11Lentšu la re: Tšwaa o eme thabeng pele ga Morena. Gona moo Morena a feta a etilwe pele ke ledimo le legolo le maatla, le le pharolago dithaba le pšhatlaganya maswika. Fela, Morena o be a seo mo ledimong leo. -- Ledimo la latelwa ke tšhišinyego ya lefase. Fela, Morena o be a seo mo tšhišinyegong yeo.

12Tšhišinyego ya latelwa ke mollo. Fela Morena o be a seo mo mollong woo. -- Mollo wa latelwa ke modumo wa phefšana e boleta.

13Ya re ge Eliya a ekwa wona woo, a bipa sefahlogo sa gagwe ka kobo ya gagwe, a tšwa a ema molomong wa mphoma; a kwa lentšu le mo rera le re: Eliya, o nyakang fa?

14Eliya a re: Ke be ke galefile ke lwela Morena Modimo wa mašaba, gobane Baisiraele ba lahlile kgwerano ya gago, ba phušotše dialetare tša gago, ba bolaile baporofeta ba gago ka lerumo; bjale go šetše nna ke nnoši; gomme ba nnyaka gore ba nkamoge bophelo.

15Morena a mo laela a re: Sepela, o gome ka tsela ya gago ya lešokeng, o ye Damaseko, o fihle o tlotše Hasaele e be kgoši ya Siria.

16O tlotše Jehu morwa wa Nimisi e be kgoši ya Isiraele; gomme Elisa morwa wa Safate wa Abele Mehola o mo tlotše e be moporofeta legatong la gago.

17Gomme e a tlogo phonyokga lerumo la Hasaele o tlo bolawa ke Jehu; gomme e a tlogo phonyokga lerumo la Jehu o tlo bolawa ke Elisa.

18Gomme mo go Isiraele ke sa šadišitše ba dikete tše šupago, e lego matolo ka moka a sa kago a khunamela Baali, le melomo e sa kago ya o atla.

19Eliya a tloga moo; a hwetša Elisa morwa wa Safate a lema ka dipholo tša dijoko tše lesome le metšo e mebedi, di le pele ga gagwe, yena a le go ye ya lesome le metšo e mebedi. Eliya a feta a mo apeša kobo ya gagwe.

20Elisa a tlogela dipholo tša gagwe, a kitima a mo latela a re: A ko ntese ke laelane le tate le mme, ke tsebo go latela.

Eliya a re: Sepela mme o boe. Se ke go dirilego sona ke eng?

21Elisa a goma, a ya a tšea dipholo tša joko e tee, a di hlaba, a apea dinama ka dijoko tša dipholo, a di nea batho ba ja; ke moka a nanoga a latela Eliya a mo hlankela.