1Morena, o a ntlhaologanya, o a ntseba.
2O ntseba ge ke dula, le ge ke tsoga; o ntemoga tša pelong, ge di sa le kgole.
3Ge ke sepela, le ge ke yo lala, o a ntšhetša; ditsela tša ka tšohle o di ela tlhoko.
4Polelo, ke ge e sešo ya tšwa lelemeng la ka, Morena, ke ge o šetše o e tseba yohle.
5O ntika ka pele le ka morago, le ka godimo ga ka o bea seatla sa gago.
6Go hlaologanya matete ao go mpaletše; di nkgoletše, se di kgone.
7Moya wa gago nka o efoga kae? Fahlogo sa gago nka se tšhaba ka ya kae?
8Ge nka rotogela godimong, ke yo hwetša o le gona. Ge nka yo ikalela kua bodulabahu, o tlo ba o le gona moo.
9Ge nka phurolla diphego tša mahuba, ka yo dula kua magomong a lewatle,
10le gona kua ke tlo hlahlwa ke seatla sago; letsogo lago le letona le tlo ntshwara.
11Le ge nka re: Leswiswi a le nkute ruri, ka re: Seetša se be bošego ka lebaka la ka,
12go wena leswiswi le ka se fifatše, bošego bo bonega bjalo ka mosegare; leswiswi le seetša e fo ba setee.
13Gobane ke wena mmopi wa letswalo la ka; ke logilwe ke wena mmeleng wa mme.
14Ke a go leboga ge o mpopile wa matetetete; mediro yago ke mehlolo; le moya wa ka o hlatha tše kgolo.
15Ditho tša ka, mola di bopega kutamong, go wena di be di sa utagale, mola ke sa logega botenyeng bja lefase.
16Mahlo a gago a mpone ke sešo ka bopega; pukung ya gago ke ge di šetše di ngwadilwe tšohle, matšatši a beilwe, go šešo gwa tšwelela le letee la ona.
17Gomme nna, tše di lego mo pelong ya gago, wena Modimo, di mpaletše ruri; ke tše ntšintši di sa balwego.
18Ge nka re ke a di bala, di feta mohlaba go ata. Ge ke re ke feditše, ke hwetša ke sa na le wena.
19Modimo, o kabe o bolaya bakgopo! Lena batho ba madi, ntlogeleng!
20Ke bona bao ba go bolelago ka tše mpe; ba ikgodiša ka tša lefela, e le manaba a gago.
21Morena, a nka se hloye ba ba go hloyago? A nka se hlaswe ba go tsogelago?
22Ke ba hloile ke gaketše, ke manaba a ka.
23Modimo, mphetleke, o tsebe pelo ya ka; o nteke o tsebe dikgopolo tša ka.
24O mpone ge nka ba wa tsela e mpe, o nkiše tseleng e sa felego.
Who We AreWhat We EelieveWhat We Do
2025 by iamachristian.org,Inc All rights reserved.
