1Ka morago ga ditaba tše Dafida a buša a fenya Bafilisita, a ba kokobetša, a ba amoga maatla a go buša dilete.
2A fenya le Bamoaba, a ba ladiša fase, a ba ela ka lenti; a ela gabedi, ba bolawa; a ela gatee ba leswa. Gomme Bamoaba ya ba balata ba Dafida, ba ntšha diloba.
3Dafida a fenya le Hadada-Esere morwa wa Rehobo kgoši ya Tsoba mola a tlile go tsoša mmušo wa gagwe nokeng ya Forate.
4Dafida a mo amoga banamedi ba dipitsi ba sekete le makgolo a šupago; a thopa banna ba bahlabani ba dikete tše masome a mabedi; dipitsi a di kgaola mešifa, a itšhadišetša tše lekgolo tša dikoloi.
5Gwa tla Basiria ba Damaseko ba phalalela Hadada-Esere kgoši ya Tsoba; Dafida a ba fenya a bolaya ba dikete tše masome a mabedi a metšo e mebedi.
6Kua nageng ya Siria ya Damaseko Dafida a bea bakgoma ba gagwe; Basiria ba loba ba montšhetša dibego. Morena a ema le Dafida mo gohle a ilego ntshe.
7Dafida a tšea dikotse tša gauta tše a di hweditšego go bahlanka ba Hadada-Esere, a di tliša Jerusalema.
8Kua metseng ya Hadada-Esere, kua Beta le Berothai, Dafida o rebotše mphiri o montši ka kudu.
9Bjale Thoi kgoši ya Hamathi ge a ekwa gore Dafida o fentše madira a Hadada-Esere ka moka,
10a roma Jorama morwa wa gagwe, a tla go Dafida a loba, a mo reta ka ge a hlabane le Hadada-Esere a mo fenya, a ipega ka dibja tša silifera le tša gauta le tša mphiri.
11Tšona tšeo Dafida o di kgethetše Morena, gotee le disilifera le digauta tše a di kgethetšego Morena a di tšere go ditšhaba ka moka tše a di fentšego,
12go Basiria, le go Bamoaba, le go Baamoni, le go Bafilisita, le go Baamaleke, le dithebola tša Hadada-Esere morwa wa Rehobo kgoši ya Tsoba.
13Leina la Dafida la retwa mola a boa a fentše Basiria Moeding wa Letswai, a bolaile ba dikete tše lesome le metšo e seswai.
14Kua Edomo a bea bakgoma ba gagwe; Baedomo ka moka ya ba bahlanka ba Dafida; gomme Morena a ema le Dafida mo gohle a ilego ntshe.
15Gomme Dafida a buša Baisiraele ka moka; setšhaba sa gagwe ka moka a se buša ka molao wa go loka.
16Joaba morwa wa Tseruya e be e le yena molaodi wa dira. Josefate morwa wa Alihudi e be e le yena letona la mošate.
17Tsadoko morwa wa Ahitobo, le Ahimeleke morwa wa Abyathara e be e le bona baperisita. Mongwadi e be e le Seraya.
18Benaya morwa wa Joyada e be e le yena molaodi wa dira tša mošate. Barwa ba Dafida e be e le bakgoma.
Who We AreWhat We EelieveWhat We Do
2025 by iamachristian.org,Inc All rights reserved.
