JESAYA 10 - Northern Sotho 1951/1986（NSO51）

Kotlo ya baahlodi ba ba sa lokago, le ya Baasuri. Phologo ya mašalela

1Kotsi e tlo wela balai ba go laya dibe, le bangwadi ba go ngwala tša bošula,

2e le go senyetša badiitšana taba, e le go hlokiša babotlana ba setšhaba sa ka moahlolelo wa go loka, e le go hlakola ba bahlologadi, e le go rebola tša dišuana.

3Le tlo dira bjang mohla wa tlhahlobo, wa ledimo letšwakgole? Le tlo tšhabela go mang la phologa? Mme lehumo la lena le tlo le tlogela kae?

4Ge e se go kukubana le le gare ga batlengwa, go rapalala le ba ba bolailwego. Le ka tša bjalo bogale bjagwe ga bo phohle; letsogo la gagwe le sa emišitšwe.

5Kotsi e tlo wela Asuri, e lego yona thupa ya bogale bja ka. Lepara la mohla ke befelwago le atleng sa gagwe.

6Ge setšhaba se na le bohlola, ke mo roma a ya; ke mo gafela tšhaba se se mpefelago, a thopa mathopša, a rebola dithebola, ka mo lesa a se gatakanya bjalo ka seretse mekgotheng.

7Yena ga a realo; pelo ya gagwe ga e eleletše tšeo. Ge e le pelo ya gagwe e re: Ke a šwalalanya, ke fediše ditšhaba tše dintsi.

8Yena o re: Matona a ka ohle a ga se magoši!

9A ga a swane ohle? Kaloni le Karakemisi, le Hamathe, le Damaseko le Samaria.

10Yena o re: Tsogo la ka le thubile mebušo ya medimo, ye diswantšho tša yona di phalago tša Jerusalema le tša Samaria.

11A Jerusalema le medimo ya gona, a nka šitwa go e dira tše ke di dirago Samaria le medimo ya gona?

12E tlo re ge yena Mong a bohle a phethile mediro ya gagwe yohle thabeng ya Tsione le Jerusalema, ke mo a tlogo lata molato wa boipoti bja pelo ya kgoši ya Asuri, ge a kgantšha mahlo a ikgogomoša.

13Ka gobane yena o re: Ke di dira ka maatla a letsogo la ka le ka bohlale bja ka, nna Matseba; ke široša mellwane ya ditšhaba, ke thopa matlotlo a tšona; nka poo ke tekola badudi ba bogoši.

14O re: Atla sa ka se hweditše menono ya ditšhaba e etša sehlaga, ka ola mafase ka moka boka motho ge a gopa mae a a hladilwego, gwa se be le wa go phaphamela, le wa go ahlama a re: Tswiri!

15A selepe se ka repa moremi? Mphaka a o ka nyatša mosegi? Le kgati ga e fekaetše mokgi; le phata ga e tope; go topa yo e sego phata.

16Mong a bohle Morena wa mašaba o tlo lefetša, a roma bokoka a fetša makhura a gagwe; bokwala bja gagwe o tlo goteletša mollo bja tuka bja swa.

17Ke mo go tlogo tuka seetša sa Isiraele; Mokgethwa wa Isiraele o tlo ba kgabo e tukago, e fišago meetlwa le hlaga ya Asuri ka tšatši le tee.

18O tlo fediša botse bja sekgwa sa gagwe, le mašemo agwe; o tlo thoma ka meoya, a fetša ka mebele; gwa tlo etša mola go feletše morwadi wa sefoka.

19Gomme hlare tša sekgwa sa gagwe e tlo šala e le matankolo, ao le mošimanyana a kago a bala.

20Mehleng yeo mašalela a Isiraele, le baphologi ba moloko wa Jakobo, ba ka se hlwe ba bota yola a ba otlilego; ba tlo bota Morena Mokgethwa wa Isiraele, mme ba mmotegela.

21Tšhalela di tlo boa; mašalela a Jakobo a tlo boela go Modimo Ramaatla.

22Le ge setšhaba sago, wene Isiraele, se atile wa lešabašaba la lewatle, ba ba tlogo boa ke tšhalela fela. Go fedišwa ke taba ye e tiilego; molao o tlo gogola.

23Gobane Mong a bohle Morena wa mašaba o tlo phetha taba ye e tiilego ya go fediša mo nageng ka moka.

24Ke ka baka leo Mong a bohle Morena wa mašaba a boletšego a re: Lena setšhaba sa ka baagi ba Tsione, se boifeng Asuri, le ge a le otla ka kgati, le ge a ka le oma ka lepara ka mokgwa wa Egipita.

25Ka gobane nka se iše kgole ke ba galefetše; hlonya ya ka e tlo wela bala ka mašegerepe.

26Ke mo Morena wa mašaba a tlogo akalatša tshelane go bona, boka mola go otlwa Midiane Lentšweng la Magukubu; o tlo emiša lepara la gagwe a šupa lewatle ka mokgwa wa mola Egipita.

27Mohla woo o tlo rola morwalo wa bala, joko ya bona ya tlošwa molaleng wa gago; joko e tlo sohlologa o nonne.

28O tla Ayathe, o fetela Migirone, diphahlo tšagwe o di šia Mikimase.

29Ba rotoga ka sefata, ba re re yo lala Geba, ba Rama ba a roromela, ba Gibeasaulo ba tšhabile.

30Hee Bathegalimi, hlaba mokgoši! Hee Laise, phafoga! Joo Anathothe wa batho, joo!

31Kwa Mademena ba ipha lešoka; makoko a Gebima a lehwidihwidi.

32O tla a ema Nobe e sa le lehono, a emiša letsogo a oma thaba ya morwedi wa Tsione le mmoto wa Jerusalema.

33Bjale gomme Mong a bohle Morena wa mašaba ke mo a tlogo roba makala wa sehlogo, a matelele a tlo remiwa, a phagamilego a tlo ušetšwa fase.

34Sekgwa se se rumanego o se hlothola ka tšhipi; Libanoni o ušwa ke Ramaatla.