JESAYA 34 - Northern Sotho 1951/1986（NSO51）

Manaba a setšhaba sa Modimo a tlo otlwa

1Hee lena ditšhaba, batamelang! Hee lena merafo, theetšang! Naga a e kwe, le tšohle tše di lego mo go yona; le lefase, le tšohle tše di tšweletšwago ke lona.

2Gobane Morena o galefetše tšhaba tšohle, o befetšwe ke madira ohle a tšona, a di gafamoka a re di bolawe.

3Mme babolawa ba tšona ba tlo lahlwa; mme seuta sa ditoto tša bona se tlo hlatlogela kua godimo, dithaba di tlo ela madi a bona.

4Mme makoko ka moka a legodimo a tlo ela a tologile, magodimo a tlo menwa bjalo ka lengwalo, mme makoko a ona ka moka a tlo hlohlorega boka matlakala a morara ge a omeletše mme a hlohlorega, boka matlakala a mogo ge a hlohlorega.

5Gobane rumo la ka mo legodimong le builwe; bjale le tlo theogela kua Edomo, le tlo theogela tšhaba seo ke se lahlilegomoka ka molao.

6Lerumo la Morena le tletše madi le kgamethe makhura le madi a dikwana le a diphokwana, a dipshio tša dikgapa; gobane Morena o hlaba sedimo Bosera; naga ya Edomo o e dira leuba le legolo.

7Le dinare di fologela gona le bona, le dipowana le dipoo; mme naga ya bona e tlo hora madi, le lerole la yona le tlo tshutshuma makhura.

8Gobane e tlo ba e le letšatši la tefetšo la Morena, e le ngwaga wa go lefeletša ba ba lwago le Tsione.

9Dinokana tša Edomo e tlo ba tša motimmu; mmu wa gona e tlo ba tshebela, le naga ya gona e tlo ba ya motimmu o tukago.

10O ka se time mosegare le bošego; muši wa gona o tlo rotoga go ya go ile; e tla ba lešope le le sa tsogego, leilwakebafeti.

11Go tlo dula bomašianoka le dinoko, e tlo ba legae la magukubu le maribiši; gobane naga yeo e beetšwe kgobelano le lefela.

12Dikala tša go bopa kgoši di tlo hlokwa; ba tlo ba ba fedile, bakgomana ba Edomo.

13Nywakong ya ka mošate go tlo tlala meetlwa; mo dibong tša gona go tlo mela tshehlo le mekolonyane; e tlo ba letšaba la phukubje, le mafulo a mpšhe.

14Ke mo go tlogo bokanela phiri le mahlalerwa, mo go gahlanago ditotwane, le badimotsela ba tlo lala gona, e le ga gabobona.

15E tlo ba legae la mogohla, wa beela mae gona, wa phaphaša, wa menagana moriting; le manong a tlo bokana gona le a gao.

16Fenyekang mangwalo a Morena le a bale. Le tlo hwetša go se le letee le le kago hloka le le amanago nalo; gobane a laetšwe ke molomo wagwe, a beakantšwe ke moya wa gagwe.

17Ke yena a ba beetšego mellwane ya bona, a ba kgaolela naga ya bona ya go tlo dulwa ke bana ba bona le tlogolo tša bona.