1Morena, o reng o ema kgole? O reng o sa tšwelele mohla wa tlalelo?
2Mmotlana o swa ka boikgodišo bja babe. A ba tanywe ke maano ba go a loga.
3Ba babe ba opela koša ya dikganyogo tša bona; ba megabaru ba a itheta, ba nyatša Modimo.
4Ba babe ba šatalala ba re: Ga go Molefetši! Ga go ne Modimo! Ba realo, ke moka.
5Ba letlwa ke ditsela mehla yohle; kahlolo tša gago di godimo, ga ba di bone; ba getla ba ba lwago nabo.
6Mobe mo pelong ya gagwe o re: Nka se šuthe fa! Ke wa go se welwe ke bošula neng le neng!
7Molomo wa gagwe o tletše maroga, le bofora le ditshele; leleme la gagwe le ne leswenya le lonya.
8O dula a laletše metsaneng; a le sekhung o bolaya motho a se nago taba; mahlo a gagwe a tsoma molahlegi.
9O boba boka tau mo hlageng; o laletše sešuana gore a se sware. Mme o swara sešuana a se goga ka lokwa la gagwe.
10O a khukhuna a batalala; mme motho wa batho o swarwa ka dinala.
11Ka pelong ya gagwe o re: Modimo o lebetše; o širilwe sefahlego; ga a ke a bona selo.
12Morena, nanoga, o emiše letsogo; se lebale sešuana.
13A yo mobe o tlo fela a go nyatša, wena Modimo, a re: Ga o latišiše?
14Aowaa, o di bone, mabošula le masetlapelo o a ela hloko, gore seatla sa gago se tle se dire. Ba ba lapilego ba šetše e le ba gago, Molweladišuana.
15Roba mosenyi letsogo; e mobe latišišiša makgopo a gagwe, gore a se hlwe a bonwa.
16Kgoši ke yena Morena ka mehla le mehla le neng le neng; bantle ba a fela mo nageng ya gagwe.
17Morena, dipelaelo tša bahlaki o di kwile; O ba bea pelo o ba sekegetše tsebe.
18Gore o namolele dišuana le bahlaki; motho wa lefase a se hlwe a tšhoša batho.
Who We AreWhat We EelieveWhat We Do
2025 by iamachristian.org,Inc All rights reserved.
