Tshenolo 11 - Contemporary Southern Sotho Bible 2024（CSOB24）

Tshenolo 11

1Yaba ke newa lehlaka le kang molamu, mme lengeloi la ema, la re: Tsoha, o lekanye tempele ya Modimo, le aletare, le ba rapelang ka ho yona.

2Empa lebala le kantle ho tempele o le tlohele, o se ke wa le lekanya; hobane e neilwe Baditjhaba: mme ba tla hatakela motse o halalelang ka maoto ka dikgwedi tse mashome a mane a metso e mmedi.

3Ke tla nea dipaki tsa ka tse pedi matla, mme di tla porofeta ka matsatsi a sekete se nang le makgolo a mabedi a mashome a tsheletseng, di apere lesela la mokotla.

4Bana ke mehlwaare e mmedi, le dikandelare tse pedi tse emeng pela Modimo wa lefatshe.

5Ekare ha motho a rata ho di etsa hampe, mollo o tla tswa melomong ya tsona, o tjhese dira tsa tsona;

6Ba na le matla a ho kwala lehodimo, hore pula e se ke ya na mehleng ya ho porofeta ha bona, mme ba na le matla hodima metsi ho a fetola madi, le ho otla lefatshe ka dikotlo tsohle, hangata kamoo ba ratang kateng.

7Etlare hobane ba qete bopaki ba bona, sebata se nyolohang sekoting, se tla ba lwantsha, mme se tla ba hlola, se ba bolaye.

8Mme ditopo tsa bona di tla rapalla lepatlelong la motse o moholo, oo ka moya o bitswang Sodoma le Egepeta, moo le Morena wa rona a thakgisitsweng teng.

9Mme batho ba ditjhaba le ba merabe le ba dipuo le ba ditjhaba ba tla bona ditopo tsa bona ka matsatsi a mararo le halofo, mme ba ke ke ba dumela hore ditopo tsa bona di kenngwe mabitleng.

10Mme ba ahileng lefatsheng ba tla thaba ka baka la bona, ba nyakalle, ba romelane dimpho; hobane baporofeta bao ba babedi ba ne ba hlokofatsa ba ahileng lefatsheng.

11Eitse hobane ho fete matsatsi a mararo le halofo, Moya wa bophelo o tswang ho Modimo wa kena ho bona, mme ba ema ka maoto a bona; mme tshabo e kgolo ya wela ba ba bonang.

12Ba utlwa lentswe le leholo le tswang lehodimong, le re ho bona: Nyolohelang kwano. Mme ba nyolohela lehodimong ka leru; mme dira tsa bone di ne di ba bona.

13Ka yona nako eo ha eba le tshisinyeho e kgolo ya lefatshe, mme karolo ya leshome ya motse ya wa, mme tshisinyehong eo ha bolawa batho ba dikete tse supileng, mme ba setseng ba tshoha, mme ba tlotlisa Modimo wa lehodimo.

14Bomalimabe ba bobeli bo fetile; mme bonang, bomalimabe ba boraro bo tla kapele.

15Lengeloi la bosupa la letsa; mme ha utlwahala mantswe a maholo lehodimong, a re: Mebuso ya lefatshe e fetohile mebuso ya Morena wa rona le ya Motlotsuwa wa hae; mme o tla busa ka ho sa feleng le kamehla.

16Baholo ba mashome a mabedi a metso e mene, ba dutseng ditulong tsa bona pela Modimo, ba itihela fatshe ka difahleho, ba kgumamela Modimo.

17Ba re: “Re a o leboha, Morena Modimo ya Matla wohle, ya leng teng, ya neng a le teng, ya tlang ho tla; hobane u inkele matla a hao a maholo, ’me ua busa.

18Mme ditjhaba tsa halefa, mme kgalefo ya hao e tlile, le nako ya bafu ya ho ahlolwa, le hore o nee bahlanka ba hao baporofeta, le bahalaledi, le ba tshabang lebitso la hao moputso o monyenyane le leholo; le ho senya ba senyang lefatshe.

19Mme Tempele ya Modimo ya bulwa lehodimong, mme ha bonwa areka ya selekane sa wona ka tempeleng ya wona, mme ha eba le mahadima, le mantswe, le diaduma, le tshisinyeho ya lefatshe, le sefako se seholo.