2 Bakorinthe 3 - Contemporary Southern Sotho Bible 2024（CSOB24）

2 Bakorinthe 3

1A re boela re qala ho ithorisa? Kapa na, joalo ka ba bang, re hloka mangolo a bopaki a eang ho lōna, kapa lengolo la bopaki le tsoang ho lōna?

2Lona le lengolo la rona le ngotsweng ka dipelong tsa rona, le tsejwang, le balwang ke batho bohle.

3Erekaha le bonahaditswe hore le lengolo la Kreste, le ngotsweng ke rona, e seng ka enke, empa e le ka Moya wa Modimo o phelang; e seng matlapeng a lejoe, empa matlapeng a nama a pelo.

4Mme re na le tshepo e jwalo ho Modimo ka Kreste.

5E seng hore re lekane ka borona ho nahana ntho leha e le efe e ka e tswa ho rona; empa ho lekana ha rona ho tswa ho Modimo;

6Ke yena ya re entseng hore re be basebeletsi ba selekane se setjha; e seng wa letere, empa e le wa moya: hobane lengolo le a bolaya, empa moya ke wona o phedisang.

7Empa ha tshebeletso ya lefu, e ngodilweng, e betlilweng majweng, e ne e na le kganya, hoo bana ba Iseraele ba neng ba sitwa ho tadima sefahleho sa Moshe ka baka la kganya ya sefahleho sa hae; e leng tlotla e neng e tla fela.

8Tshebeletso ya Moya e ke ke ya ba le kganya e fetisang jwang?

9Hobane tshebeletso ya kahlolo ha e ka ba le kganya, tshebeletso ya ho loka e tla fetisa kganya ka ho fetisa hakakang.

10Hobane le sona se neng se tlotlisitswe ha se a ka sa kganya ka mokgwa oo, ka baka la kganya e fetisisang.

11Hobane ha se neng se fela se bile le kganya, se sa feleng se tla ba le kganya e kgolo hakaakang!

12Ka hona, kaha re na le tšepo e joalo, re bua ka bolokolohi bo boholo.

13E seng jwaloka Moshe ya neng a ikgurumetsa sefahleho ka lesira, hore bana ba Iseraele ba tle ba se ke ba tadimisisa pheletso ya ntho e felang.

14Empa dikelello tsa bona di ne di foufaditswe, hobane ho fihlela kajeno lona lesira leo le ntse le sa tlosoe ha ho balwa testamente ya kgale; lesira leo le tlositsweng ho Kreste.

15Empa ho fihlela kajeno, ha Moshe a balwa, lesira le ntse le le hodima dipelo tsa bona.

16Leha ho le jwalo, mohla ba sokolohelang ho Morena, lesira le tla tloswa.

17Jwale Morena ke Moya oo; mme moo Moya wa Morena o leng teng, ho na le tokoloho.

18Empa rona bohle, ka difahleho tse ahlamileng, re tadima jwaloka seipone kganya ya Morena, re fetohela setshwantshong se le seng ho tloha kganyeng ho isa kganyeng, jwalokaha re le ka Moya wa Morena.