Apocalipsis 18 - Aymar Bibliia 1986

Babilonia marcan aynacht'atapa

1Take ucanaca pasatatsti yakha angelaruraquiw uñjaracta alajjpachat wali munañani sarakasinquiri, khanapasti take aca orakpacharuraquiw khant'äna.

2Wali jach'ataraqui art'asïna:

“¡Aynacht'jjewa, aynacht'jjewa jach'a Babiloniajja!

¡Supayanacan utjäwipawa tucuwayjjaraqui, take casta ñankha ajayunacan putuparaqui,

uqhamarac k'añu uñisita jamach'inacan tapaparaqui!

3Take marcanacasti uca Babilonian wachoka jucha luratanacapampejj vinompjamaw macharapjje.

Acapach reyinacasti uca Babiloniampiraquiw wachoka juchan jacapjjänjja, alaquipa luriri jakenacasti jupan jan wali sarnakatapampejj waliraqui kamiriptapjjänjja” sasa.

4Ucatsti yakha aru ist'aracta alajjpachat art'asiniri:

“Nayanquir jakenaca, mistjjapjjam uca marcata, jan jupamp chica jucha lurapjjañamataqui, uqhamarac cuna t'akhesïwitejj jutcani ucasa jan jumanacjjaru puriñapataqui.

5Jucha luratanacapasti walipuniwa, alajjpachcamaraquiw puri.

Diosasti take uca jan wali luräwinacapatjja amtasiraquiwa.

6Cuntejj jupajj mayninacaru lurcänjja uca pachpa juparojj lurapjjam, pä ucqhampiraqui luratanacapatsa cutt'ayapjjam.

Cuna machjañanactï jupajj mayninacataqui waquichcän ucatjja, pä ucqhampi wali machjayiri waquichapjjam.

7Cunjämtï jupajj cusisitäcänjja uqhamarac jichhajj t'akhesiyapjjam; jupasti chuymapanjja sascaraquiwa:

“Acan nayajj mä reinar uñtata kont'atäsctwa, janiw ijmäcti, janiraquiw t'akhescäsa” sasa.

8Ucataracpï jupataquejj t'akhesiñajj mä urunac purininejja.

Ucanacasti acanacawa: jiwaña, t'akhesiña, mank'at awtjayasiña,

ucatsti ninampi naqhantayataraquïniwa; jupar juchañchir Tatitu Diosasti wali munañaniraquiwa”

9Acapachanquir reyinacasti, qhitinacatejj jupampi jucha lurasa jacapcän ucanacasti, jupar naqhantata uñjasajj wali jachapjjani, jaqhusipjjaraquini.

10Jayaruraquiw jithektjjapjjani, uca mutuñapar ajjsarasa, ucatsti sapjjaraquiniwa:

“¡Ay! ¡Babilonia jach'a marca, cunaruraqui purtasti!

¡Janc'aquiraquis mutuyäwimajj purinejjä!” sasa.

11Acapachan alaquipa lurir jakenacasti uca marcar uñjasajj jachapjjaniwa, jaqhusipjjaraquiniwa, jan jupanacat qhiti alirisa utjatap laycu.

12Ucanacasti acanacänwa: kori, kollke, suma kalanaca, perlanaca, linot lurata suma telanaca, uqhamarac suma seda telanaca, suma wila morado coloranaca, suma k'aphini maderanaca, marfilat lurat yänaca, suma maderanaca, bronce, hierro, uqhamarac marmolasa.

13Apanipjjaraquïnwa canela, suma k'apquiri kollanaca, incienso, mirra, perfumenaca, vino, aceite, suma jac'u, trigo, uqhamarac qhumt'ir uywanaca, ovejanaca, caballonaca, caballomp katatiñ carronaca, apanipjjaraquïnwa esclavonacsa.

14Uca marcarusti sapjjaraquiniwa:

“¡Janiraquis suma mojjsa achunacamajj utjcjjtamtejjä.

Uca achunacjj waljjay jumajj munirïstajja!.

¡Wiñayataquiraquiw apt'asjjtajja take suma cancañama uqhamarac kamir cancañamsa!” sasa.

15Qhitinacatejj aca marcampi alaquipa lurapcäna, uqhamarac uca toke kamiriptapcän ucanacasti mutuyäwipar ajjsarasajja jayjat sayt'asaw jachapjjani, jaqhusipjjaraquini.

16Sapjjaraquiniwa:

“¡Ay! ¡Jan cunani jach'a marca, cunaruraqui purt'astajja!

Mä suma warmiru uñtatapunïnwa, suma lino isinacampi isthapita, suma wila color isinacani, korimpi, suma kalanacampi, perlanacampi c'achacht'ata.

17¡Janc'aquiraquis take uca kamir cancañajj tucusjjejjä!” sasa.

Take barco apnakeri capitananacasa, marineronacasa, pasajeronacasa, qhitinacatï jach'a kotan irnakapqui ucanacasa, ajjsarañatsa jayjatacwa sayt'anipjjäna.

18Uca marcan naqhatapat jek'e mistur uñjasasti, jach'at art'apjjaraquïna: “¿Cawquïri marcaquisa aca jach'a marcjamänjja?” sasa.

19Ucatsti lak'anacampiw p'ekenacapatjja willjjatasipjjäna, jachapjjaraquïnwa, wararipjjaraquïnwa:

“¡Ay! ¡Jan cunani jach'a marca!

Take barqueronacasa aca marcampiraquiw kamiriptapjjänjja, ¡jichhasti janc'aquiraquis uca kamir cancañapajja tucusiwayjjejjä!

20Ucampis cusisipjjam, jumanac, alajjpachanaca, apostolonaca, Diosan arup parlirinaca, uqhamarac qhitinacatejj Diosancapcta ucanacasa, Diosasti uca marcar juchañchasajja jumanacjjaruw cheka uñjäwi lurapjjtamjja.”

21Ucatsti munañani mä angelaraquiw mä jach'a kala apti molin kalar uñtata, ucatsti jach'a kotaruraquiw jakonti aqham sasa:

“Aqhamaraquiw jach'a Babilonia marcajj jakontatäni, janiraquiw mayampsa cuttancjjaniti.

22Callenacapansti janipuniw cuna casta musicasa ist'ascjjaniti, janiraquiw cuna casta irnakerinacasa juman ucanjj utjcjjaniti, ni molino kalan suenatapas ist'ascjjaniti,

23janiraquiw jumanjja ni cuna casta lampar khanas khancjjaniti, janiraquiw ist'ascjjaniti casarasirinacan fiestapan ojjotanacapasa.

Jumampi alaquipa lurir jakenacajj nayrapachajj wali munañaninacäpjjänwa acapachanjja, take marcanacarusti laykasitanacamampiraquiw sallkjäyätajja.”

24Ucampis uca marcajj Diosat parlirinacarojj jiwarayänwa, uqhamarac take qhitinacatejj Diosancapqui ucanacarus t'akhesiyänwa, uqhamarac take qhitinacatejj aca oraken jiwayatäpcänsa ucanacatsa jupajj juchanïnwa.