2 Corintios 9 - Aymar Bibliia 1986

Jilatanacataqui ofrenda apthapiña

1-2Nayasti jumanacan suma chuymanïpjjatamjja yattwa. Ucatwa jumanacajj jilatanacasatac ofrenda apthapt'añ toketjja jan cuna sañäpctasa. Macedonia tokenquir jilatanacarojj cusisiñampipuniw sistjja: “Acaya tokenquir jilatanacajj maymäratpach janc'aquïpjjewa yanapt'asiñataquejja” sasa. Ucatsti Macedonianquir jilatanacatjja waljaniw jumanacan suma chuymanïpjjatam laycojj yanapt'asiñ munapjjaraqui.

3Ucampis aca jilatanacaruw jichhajj qhitasinctjja, cuntejj jumanacjjatjja aca toket parlcta ucajj jan c'ari mistsuñapataqui, uqhamata jumanacajj janc'aquïpjjañamataqui cunjämtejj siscta uqhamaru.

4Inampisa Macedonia jilatanacajj nayamp chica jutaspan, ucatsti jumanacarojj jan waquicht'ata catjapjjeristam. Ucajj nanacarojj walpun p'enkasiyapjjetaspa nanacan jumanacar wali alcatasitanacajjata, uqhamarac jumanacataquis mä p'enkaraquïspawa.

5Ucatwa nayatakejj waljamäna uca jilatanacajj jumanacan ucaru nayrakata jutañapa, ucatarac jupanacarojj achict'tjja uqham jutapjjañapataqui, ucatsti jumanacar yanapt'añapataqui uca ofrenda “Churapjjäw” sapcäyätas uca phokhapjjañamataqui. Uqhamataracwa jumanacan ofrendanacamajj waquicht'atäjjani chekpachansa mä munasiña uñacht'äwïñapataqui, janiraqui nanacas jumanacar: “Churapjjapunim” sasa, wayt'apquirisman uqhamjja.

6Jumanacasti acat amtasipjjaraquim: Juc'a yapuchasirejj, juc'aquiracwa achunacjja apthapini, walja yapuchasiristi, waljaraqui apthapini.

7Sapa mayniw, cunjämtï chuymapanjja amtqui uqhamarjam churañapa; janiw pä chuyma churañapäquiti, janiraquiw maynin jariyataquis churañapäcaraquiti, Diosasti cusisit chuymampi chuririruw munaraqui.

8Diosajj jumanacarojj take casta bendicionanacwa jilarquir churapjjeristamjja, uqhamat jumanacajj take cunampis phokt'atäpjjañamataqui, ucat take asqui luräwinacan yanapt'asipjjañamataqui.

9Diosan Arupasti saraquiwa:

“Jan cunaninacarojj take chuymaw churi, suma luräwinacapasti wiñayataquiraquiwa.”

10Qhititejj jatha churi yapuchañataqui, uqhamaraqui mank'a mank'asiñataqui uca Diosasti jumanacarojj take cunwa churapjjätam yapuchapjjañamataqui. Uca yapuchäwinacamsti jiltayaraquiniwa, ucatsti suma luräwinacamsti wali jach'a cosechäcaspas uqhamaracwa apthapiyapjjätamjja.

11Uqhamataracwa jumanacarojj take kamir cancañas utjapjjätamjja, mayninacarojj cusisiñampi yanapt'apjjañamataqui. Cuna ofrendtï nanacar jilatanacatac apayapquista ucatjja, jilatanacajj Diosaruw yuspagarapjjaraquinejja.

12Aca yanapa jilatanacar churasajja janiw cunatejj jupanacan jan utjqui ucaqui churctanti, jan ucasti ucampejj Diosaruw jupanacarojj juc'ampi yuspagarayapjjtanjja.

13Aca yanapasti jupanacarojj Tatitun arunacaparjam sarnakapjjatamwa uñacht'ayani, ucatsti jupanacajj Diosaruw yupaychapjjani. Diosarusti jach'aruraquiw aptapjjani, jumanacajj uqham cusisit chuymampi jupanacataquis, takenitaquis apthapt'apjjatamatjja.

14Jupanacasti jumanacataquejj take munasiñampiw Diosat mayipjjaraquini, Diosajj jumanacar jach'a qhuyapayasiñap uñacht'ayatapata.

15¡Yuspagaratäpan Diosajja! ¡Jiwasarojj mä jach'a churäwi churistojja, ucasti jan amuyt'cayawa!