2 Crónicas 2 - Aymar Bibliia 1986

Salomonan Tiro marcanquir Hiram reyimpi sumar mantatapa(1 R 5.1-18; 7.13-14)

1Salomonajj Tatitutaqui mä templo lurañwa amtäna, uqhamarac jupataquisa palaciopa lurayañaraqui.

2Ucataquisti wact'ayänwa pakallk tunca waranka k'epnakerinaca, uqhamarac quimsakallko tunca waranka kala ch'iyirinaca, jupanacajj kolluna irnacapjjañapataqui, ucatsti quimsa waranka sojjta pataca lurayir jakenaca uca lurañanaca sarayapjjañapataqui.

3Ucatsti Salomonajj Tironquir Hiram reyirojj yatiyänwa qhitanacap tokejja, aqham sasa: “Jumajj cunjämtï David awquejjampejja lurcäyätajja uqhama luraraquim, jumajj awquejjarojj cedro madera apayanïyätajja, reyi utap lurayascän ucapachajja.

4Nayajj mä templo Tatitu Diosajjataqui lurayäjja, jupar loktañajjataqui, jupar jach'achañataqui, perfumenaca nact'ayañajjataqui, jupataqui wiñay seke t'ant'anaca loktañajjataqui, uqhamarac alwasa, jayp'usa sacrificionac nact'ayasina loktañjjataqui, samarañ urunacana, phajjsi kallta urunacana, uqhamarac Tatit Diosar jach'achañataqui yakha fiestanacansa, ucanacasti lurasipuniwa Israel marcanjja.

5Cawquïr templtejj luraycä ucajja wali jach'äñapawa, nanacan Diosajjasti take diosanacat sipansa wali jach'awa uca laycu.

6Ucampis ¿qhitis mä templo lurayañar uchasispajja, alajjpachatejj jach'ätap laycujj jan catjjäsirjamäcchi ucajja? ¿Qhitïtsa nayajj mä templo lurayañataqui, jupar jach'achañataqui incienso naqhayañataquiquisa lurayirista ucasa?

7Uqhamasti, qhitanitaya korita, kollketa, bronceta, hierrota, púrpura sat telata, wila telata, uqhamarac wila morada telata, irnakañ sum yatqui uca jakenacaru. Uqhamarac yatiraquispan talladonaca luraña nayan sirviri sarayirinacajjampi chica, Judá orakena, uqhamarac Jerusalén marcansa, jupanacsti David awquejjaw lurapjjañapataqui jaytawayi.

8Uqhamaraqui Líbano kollunacat cedro, ciprés, sándalo maderanac apayanita, nayajj yattwa sirvirinacamana Líbano kollunquir maderanaca suma qhuchhuña yatipjjatapa. Nayan sirvirinacajjasti juman sirvirinacamarojj yanapaniwa,

9uqhamata walja maderanaca waquichapjjañapataqui, nayajj templo luraycä ucajja jach'äñapawa, uqhamarac wali muspharcañaraqui.

10Ucampis jumajj yatim, nayajj irnakerinacamarojj mank'añjja churäwa, madera qhuchhurinacarusa, pusi millona pusi pataca waranka litro trigonaca, mä ucqharaqui cebadanacsa, pusi pataca pusi tunca waranka litro vinonaca, mä ucqharaqui aceitenacsa churä” sasa.

11Ucatsti Tironquir Hiram reyisti Salomonarojj mä cartwa apayanïna, aqham sasa: “Tatituw jumarojj reyita utt'aytam israelitanacjjaru, jupajj marcaparu munatap laycu” sasa.

12Ucjjarusti sascaquïnwa: “¡Israelan Tatit Diosapajj bendicitäpan, jupaw alajjpachsa acapachsa luri, juparaquiw David reyirojj churaraqui mä wali yatiñan wawa, uqhamarac yatichata, ch'iqhiraqui, jupasti Tatitutaquejj mä templo lurayani, uqhamarac mä palacio jupa pachpataquisa lurayasiraquini!

13Nayasti wali yatiñani, ch'iqhi chacha qhitansma, Hiram sata jupajj sumwa yati lurañjja.

14Jupasti Dan tributa saraker warmin wawapawa, uqhamarac awquipajja Tironquiriraqui. Jupasti yatiwa luraña korita, kollketa, bronceta, hierrota, kalata, maderata, púrpura telata, uqhamarac wila morada telata, linot luratatsa, uqhamarac wila telatsa, uqhamaraquiw yatiraqui take casta figuranaca tallaña, uqhamaraquiw luraña yatiraqui cunayman amtäwinaca waquichaña, juman yatir chachanacamasa mayipcani ucanacataquisa.

15Uqhamasti, tata, apayanimay sirvirinacamarojja trigo, cebada, aceite, uqhamarac vinsa, cunanactejj jumajj churañ munapquista ucanaca.

16Uccañcamasti nanacajj Líbano kollunjja maderanacjja qhuchhusipcäwa, kawktï jumajj muncäta ucqha, ucatsti nanacajj aparapipjjaraquïmawa balsanacata jach'a kotanjama, Jope marcacama. Ucqhatsti jumaw apayasjjäta Jerusalén marcacama” sasa.

17Ucatsti Salomonajj Israel marcan jaya jakenacajj utjapcäna ucanacwa jacthapiyäna, Davidajj uca pachpa jaqhuyaraquïna uca khepata, ucatsti pataca pheska tunca quimsani waranka sojjta patacani jakenacaw utjatayna.

18Jupanacatjja pakallk tunca waranka k'epirinaca, quimsakallk tunca waranka kala ch'iyirinaca kollunacan irnakapjjañapataqui, uqhamarac quimsa waranka sojjta patacani capatazonacwa chhijlläna, jupanacajj jakenacar lurayapjjañapataqui.